وزیراعظم محمد شہباز شریف دا اسلام آباد اچ زیر تعمیر ٹیکنالوجی پارک دا دورہ، تعمیر اچ سست روی تے کاوڑ کیتی، جلدی پورا کرݨ دی ہدایت

اسلام آباد۔14اگست (اے پی پی) وزیراعظم محمد شہباز شریف اسلام آباد اچ زیر تعمیر ٹیکنالوجی پارک دی تعمیر اچ سست روی تے کاوڑ کریندیں ہوئیں ایں کوں جلدی پورا کرݨ دی ہدایت کیتی اے۔ خمیس کوں پی ایم آفس دے میڈیا ونگ توں جاری پریس ریلیز دے مطابق وزیراعظم زیر تعمیر ٹیکنالوجی پارک دا دورہ کیتا۔ ایں موقع تے وزیراعظم ٹیکنالوجی پارک دی تعمیر دی سست رفتار تے کاور کریندیں ہوئیں آئی ٹی پارک کوں جلدی توں جلدی پورا کرݨ دی ہدایت کیتی۔ انہاں آکھیا جو ایں منصوبے کوں پہلے دی ہدایت دے مطابق ݙسائی ڳئی مدت اچ پورا کیتا ونڄے۔ وزیراعظم آکھیا جو منصوبے اچ عالمی معیار دے مطابق سہولتاں دی فراہمی کوں یقینی بݨایا ونڄے، سارے ذمہ دار ایں منصوبے کوں پورا کرݨ کیتے آپݨی کوششاں تیز کرن۔ ایں موقع تے بریفنگ اچ ݙسایا ڳیا جو آئی ٹی پارک 2 زیر زمین، گراؤنڈ اتے 9 اُتلی منزلاں تے مشتمل اے، پارک اچ دفتراں، انکیوبیشن سینٹر، بزنس سپورٹ سینٹر، تحقیق تے ترقی لیبارٹریاں، لیول تری ڈیٹا سینٹر، آڈیٹوریم اتے 1,200 گاݙیاں دی پارکنگ شامل اے۔ پارک دا مقصد نینگراں کیتے نوکریاں تے معاشی ودھارے کوں ودھاوݨا، عالمی آئی ٹی مقابلے کوں ودھاوݨ اتے ڈیجیٹل ونݙکوں ختم کرݨا اے۔