معرکہ حق ݙو قومی نظریے تے مہر ثبت کیتی، اے تاریخ اچ سنہرے اکھراں نال لکھیا ویسی، انفارمیشن وار فیئر اچ وزارت اطلاعات دا کردار ہمیشہ یاد رکھیا ویسی، وفاقی وزیر اطلاعات تے نشریات عطاء اللہ تارڑ

اسلام آباد۔14اگست (اے پی پی) وفاقی وزیر برائے اطلاعات تے نشریات عطاء اللہ تارڑ آکھیا اے جو قوم ایں سال جشن آزادی دے نال معرکہ حق دی تاریخی جت دا جشن وی منیندی پئی اے، معرکہ حق 2025ء تاریخ اچ سنہرے اکھراں نال لکھیا ویسی، ایں ݙو قومی نظریے تے مہر ثبت کیتی اتے حقیقت بݨ تے دنیا دے سامݨے آ ڳیا، انفارمیشن وار فیئر اچ وزارت اطلاعات دا کردار ہمیشہ یاد رکھیا ویسی، پاکستانی قوم اتے مسلح افواج دشمن دے عزماں کوں مٹی اچ ملا ݙتا، پاکستان آپݨا مقدمہ بھرپور انداز اچ عالمی سطح تے پیش کیتا۔ خمیس دے ݙینہ پاکستان ٹیلی ویژن ہیڈ کوارٹرز اچ یوم آزادی دے موقع تے پرچم کشائی دی تقریب توں خطاب کریندیں ہوئیں وفاقی وزیر اطلاعات آکھیا جو مئی اچ معرکہ حق ݙو قومی نظریے تے مہر ثبت کیتی اتے اے حقیقت بݨ تے دنیا دے سامݨے آ ڳیا، دشمن پہلگام واقعے دی اوٹ اچ پاکستان تے جارحیت مسلط کیتی اتے فالس فلیگ آپریشن دے ذریعے پاکستان دا وقار مجروح کرݨ دی کوشش کیتی لیکن پاکستانی قوم اتے مسلح افواج بہترین جنگی حکمت عملی نال دشمن دے عزائم مٹی اچ ملا ݙتے۔ انہاں آکھیا جو ایں سال جشن آزادی دے نال معرکہ حق دی تاریخی فتح دا جشن وی منایا ویندا پئے، اللہ تعالیٰ اساں کوں اے توفیق ݙتی جو اساں نہ صرف آزادی دی حفاظت کیتی بلکہ پوری دنیا کوں اے سنیھا وی پڄایا جو پاکستانی قوم اتے افواج پاکستان آپݨی آزادی دا دفاع کرݨ ڄاݨدن۔ عطاء اللہ تارڑ آکھیا جو ایں معرکے اچ انفارمیشن وار فیئر وی لڑی ڳئی جئیں اچ وزارت اطلاعات منفرد اتے موثر کردار ادا کیتا، ڈیجیٹل وار فیئر اچ قوم دا حوصلہ اُچا رکھݨا اتے عالمی سطح تے پاکستان دا بیانیہ اجاگر کرݨ اساݙی پہلی ترجیح ہئی، اے ہک ایجھا باب اے جو جݙاں وی تاریخ اچ لکھیا ویسی تاں سنہرے اکھراں اچ لکھیا ویسی۔ انہاں آکھیا جو 1965ء دی جنگ دے دوران پی ٹی وی توں نشر تھیوݨ آلے ملی نغمیاں افواج دا مورال اُچا کیتا، قوم کوں متحد کیتا اتے وزارت اطلاعات دیاں خدمتاں اڄ وی تاریخ دا روشن حصہ ہن، ویلھے دے نال بیانیے دی جنگ اچ ارتقاء آیا اتے ایں واری وی وزارت اطلاعات اتے پی ٹی وی موثر کردار ادا کیتا، فیک نیوز اتے پروپیگنڈا دا توڑ کیتا اتے عالمی سطح تے قومی بیانیے کوں ودھارا ݙتا۔ وزیر اطلاعات ݙسایا جو بھارت اساݙے یو ٹیوب چینلز بند کیتے تاں جواباً اساں انہاں دے یو ٹیوب چینلز تے آپݨے ملی نغمے چلائے، اے انفارمیشن وار فیئر دا ہک حصہ ہا، اساں انٹرنیشنل میڈیا تے وی پاکستان دا مقدمہ بھرپور انداز اچ پیش کیتا۔ انہاں آکھیا جو ایں کامیابی اچ وزیراعظم شہباز شریف دی رہنمائی، پی ٹی وی دی ٹیم اتے وزارت اطلاعات دے سارے شعبیاں دی سانجھیاں کوششاں شامل ہن، سیکرٹری اطلاعات عنبرین جان اتے انہاں دی ٹیم ڈیجیٹل کمیونیکیشن ڈیپارٹمنٹ قائم کیتا اتے پی ٹی وی ورلڈ دے خصوصی پروگرام شروع کیتے، ملی نغمے اتے دستاویزی فلماں نشر کیتی جنہاں عوام دا جذبہ ودھایا۔ عطاء اللہ تارڑ آکھیا جو معرکہ حق 2025ء تاریخ اچ سنہرے اکھراں نال لکھیا ویسی اتے انفارمیشن وار فیئر اچ پی ٹی وی اتے وزارت اطلاعات دا کردار ہمیشہ یاد رکھیا ویسی، ایں یوم آزادی تے اساں کوں عہد کرݨا اے جو انفارمیشن وار فیئر دا اے سلسلہ جاری رکھسوں، پی ٹی وی کوں ایں دا کھسیا ہویا مقام ول ݙیویساں، اصلاحات دا عمل جاری اے، اساں ٹھیک سَمّت تے ہن اتے حکومت دی سپورٹ نال ایں اچ ٻئی بہتری آسی۔ انہاں آکھیا جو معرکہ حق تے وزارت اطلاعات اتے پی ٹی وی دے کردار نال متعلق ہک جامع دستاویزی فلم تیار کیتی ونڄݨی چاہیدی اے تاں جو آوݨ آلی نسلاں کوں رہنمائی فراہم کیتی ونڄ سڳے۔ وزیر اطلاعات ایں موقع تے وزارت اطلاعات اتے پی ٹی وی دی ٹیم کوں شاندار خدمتاں تے خصوصی مبارخ پیش کیتی۔ ایں موقع تے وفاقی سیکرٹری اطلاعات عنبرین جان، وزارت اطلاعات اتے پی ٹی وی دے سینئر حکام اتے ݙوجھے وی موجود ہن۔