گوگل دا پاکستان دے 78ویں یوم آزادی تے قومی پرچم آلے خصوصی ڈوڈل دے ذریعے اظہار یکجہتی

اسلام آباد۔14اگست (اے پی پی) گوگل پاکستان دے 78ویں یوم آزادی دے موقع تے ہک خصوصی ڈوڈل دے نال قومی پرچم کوں ہک خصوصی ڈیزائن اچ ݙکھایا جو تخلیقی فن پاریاں دے ذریعے قومی سنگ میل کوں اعزاز ݙیوݨ دی آپݨی روایت کوں جاری رکھیندیں ہوئیں پاکستان دے اتحاد اتے فخر دے جذبے دی عکاسی کریندے۔ واضح رہے جو گوگل دا نویں توں نواں ڈوڈل پاکستان دے شاندار ورثے اتے ایں دے عوام دے مضبوط جذبے دی عکاسی کریندے۔ دنیا بھر اچ ثقافتی اتے سماجی موقعیاں دی یاد اچ تخیلاتی ڈوڈل بݨاوݨ کیتے مشہور ٹیکنالوجی کمپنی گوگل پاکستان دے 78ویں یوم آزادی دے موقع تے ہک خصوصی تصویر ظاہر کیتی اے۔ ایں سال دے ڈوڈل اچ ہلال اتے تارے دے نال پاکستان دے قومی پرچم کوں ݙکھایا ڳئے جو ہک وسیع، کھلے اسمان تے لہریندیں ہوئیں قومی فخر اتے آزادی دے پائیدار جذبے دی طاقتور علامت اے۔ گوگل ڈوڈل عالمی توجہ حاصل کیتی اے اتے ملک بھر اچ جشن آزادی دے ماحول اچ وی اہم حصہ پاتے۔ گوگل دے ڈوڈلز اکثر کہیں ملک دی بھرپور ثقافت اتے ورثے کوں نشابر کریندے ۔ 2025 دے یوم آزادی تے گوگل دا خصوصی ڈوڈل قومی پرچم تے مشتمل اے جو اتحاد، لچک اتے حب الوطنی دی نمائندگی کریندے۔ واضح رہے جو 2011 توں گوگل آپݨے ڈوڈلز دے نال پاکستان دا یوم آزادی منائی کھڑے جئیں دا شروع ہلال، تارے اتے مینارِ پاکستان دی سبز تھیم آلی تصویر دے نال کیتا ڳیا ہا۔ ویلھا گزرݨ دے نال اے روایت ملک دے سالانہ تہواراں دی ہک محبوب خاصیت بݨ ڳئی اے۔