قوم اتحاد، یقین، تنظیم اتے انتھک جدوجہد دے عزم دی تجدید دے نال 78واں جشن آزادی اتے معرکہ حق بھرپور جوش تے جذبے نال منایا

اسلام آباد۔14اگست (اے پی پی) قوم اتحاد، یقین، تنظیم اتے انتھک جدوجہد دے عزم دی تجدید دے نال 78واں جشن آزادی اتے معرکہ حق روایتی اتے ملی جوش تے جذبے نال منیندیں ہوئیں اے عزم کیتا جو وطن کوں اساں عظیم توں عظیم تر بݨیسوں، ساری اوکھیائیاں تے قابو پیندیں ہوئیں قومی یکجہتی اتے ݙینھ رات دی محنت نال اقوام عالم اچ آپݨا ونڄیا ہویا مقام ولا حاصل کریسوں، آزادی دا تحفظ ہر پاکستانی دی ذمے واری اے۔ خمیس کوں یوم آزادی دے موقع تے ݙینھ دا شروع وفاقی دارالحکومت اچ 31 جݙاں جو صوبائی دارالحکومتاں اچ 21،21 توپاں دی سلامی نال کیتا ڳیا۔ مسیتاں اچ پاکستان دی ترقی، استحکام اتے خوشحالی کیتے خصوصی دعاواں منڳی ڳئی۔ جشن آزادی دے سلسلے دی سب توں وݙی تقریب گزریل رات سپورٹس کمپلیکس اچ تھئی۔ جتھ پاک فضائیہ دے جنگی طیاریاں بھرپور فلائی پاسٹ دا مظاہرہ کیتا۔ ایں تقریب اچ صدر مملکت آصف علی زرداری، وزیراعظم محمد شہباز شریف، چیف آف فیلڈ مارشل سید عاصم منیر بطور مزمان خصوصی شرکت کیتی۔ مسلح افواج دے سربراہان، وفاقی کابینہ دے ارکان سودھے وݙی تعداد اچ شرکاء موجود ہن۔ ایں موقع تے مسلح افواج دی شاندار پریڈ اتے ثقافتی پروگرام تھئے۔ صدر، وزیراعظم سودھے اہم شخصیتاں یوم آزادی دے موقع تے خصوصی سنیھا جاری کیتے ڳئے۔ جشن آزادی دے موقع تے پرچم کشائی دی مرکزی تقریب پاکستان مونومنٹ اچ تھئی جتھ وزیراعظم محمد شہباز شریف قومی پرچم لہرایا اتے یادگار شہداء تے حاضری ݙتی۔ دفاع سودھے آپݨے آپݨے شعبیاں اچ نمایاں خدمتاں سر انجام ݙیوݨ آلی اُچیاں فوجی تے سول شخصیتاں کوں اُچے اعزازات نال نوازݨ دی تقریب ایوان صدر اچ منعقد تھئی جئیں اچ صدر مملکت اتے وزیراعظم انہاں کوں اعزازات ݙتے۔ کنونشن سینٹر اسلام آباد اچ کلچرل شو کیتا ڳیا جئیں اچ سپیکر سردار ایاز صادق، نائب وزیر اعظم محمد اسحاق ڈار سودھے وفاقی وزراء اتے ݙوجھیاں شرکت کیتی۔ وزیر اطلاعات تے نشریات عطاء تارڑ پی ٹی وی ہیڈ کوارٹر اچ پرچم کشائی کیتی اتے کیک کٹیا۔ انہاں سبزہ زار اچ یادگاری پودا لاتا۔ ایں موقع تے کراچی توں خیبر تئیں ملک بھر اچ شہر شہر، گلی گلی تقریباں کیتی ڳئی۔ اہم سرکاری اتے نجی عمارتاں تے چراغاں کیتا ڳیا۔ اسلام آباد اچ دفاعی نمائش دا اہتمام وی کیتا ڳیا۔ اخباراں اچ یوم آزادی دے موقع تے خصوصی ضمیمے اتے ٹیلی ویژن چینلز تے خصوصی پروگرام ٹیلی کاسٹ کیتے ڳئے۔ ملک اچ ایں موقع تے عام چھٹی ہئی۔ لاہور اچ جشن آزادی اتے معرکہ حق اچ کامیابی دی خوشی اچ خصوصی تقریب تھئی جئیں اچ وزیراعلیٰ مریم نواز شریف کابینہ سودھے شامل تھیاں۔ آزاد کشمیر اتے گلگت بلتستان اچ وی یوم آزادی دی تقریباں تھئی۔ چاراں صوبائی دارالحکومتاں، گلگت بلتستان، آزاد کشمیر دے علاوہ سارے ڈسٹرکٹ ہیڈ کوارٹرز اچ پرچم کشائی دی تقریباں منعقد تھیاں۔ بابائے قوم دے مزار تے گارڈز دی تبدیلی دی پروقار تقریب تھئی۔ قومی سلامتی کیتے دعا منڳی ڳئی اتے جشن آزادی دا کیک کٹیا ڳیا۔ کور کمانڈر لاہور، سپیکر پنجاب اسمبلی ملک احمد خان، پنجاب کابینہ دے ارکان مصور پاکستان علامہ محمد اقبال دے مزار تے حاضری ݙتی اتے پھلاں دی چادر چاڑھائی اتے ملکی سلامتی کیتے خصوصی دعا منڳی۔ سپریم کورٹ اتے اسلام آباد ہائی کورٹ اچ وی پرچم کشائی دی تقریباں تھئی۔ گورنر سندھ کامران ٹیسوری اتے وزیراعلیٰ سید مراد علی شاہ، کور کمانڈر کراچی اتے ایم کیوایم دے وفد وی مزار قائد تے حاضری ݙتی، پھلاں دی چادر چاڑھائی اتے فاتحہ خوانی کیتی۔ لاہور اچ علامہ اقبال دے مزار تے گارڈز دی تبدیلی دی تقریب تھئی۔ ایوان صدر مظفرآباد اچ منعقدہ تقریب اچ وزیر اعظم آزاد کشمیر چوہدری انوار الحق پرچم کشائی کیتی اتے خطاب کیتا۔ واہگہ بارڈر تے یوم آزادی دے موقع تے پرچم لہاوݨ دی تقریب تھئی۔