اساݙی حکومت پہلی واری ٹیرف کمیٹی کوں باقاعدہ منظم کیتا، سیکٹورز دی تعداد ودھا تے 17 کر ݙتی، جام کمال خان

اسلام آباد۔15اگست (اے پی پی) وفاقی وزیر تجارت جام کمال خان آکھیا جو اسٹریٹجک ٹیرف پالیسی 2021 اچ ہک فریم ورک بݨایا ڳیا ہا جو اقدامات 2021 توں 2025 دے وچال پورے نہ تھی سڳے، او ہݨ 2025 توں 2030 دی پالیسی اچ شامل کیتے ویسن۔ سمندری خوراک دی برآمد تے ٹیرف دے معاملے تے ایوان دے اجلاس اچ سینیٹر ذیشان خانزادہ دے توجہ ݙیواوݨ آلے نوٹس تے جواب ݙیندیں ہوئیں وفاقی وزیر تجارت جام کمال خان آکھیا جو سیاسی حوالے نال انہاں معاملیاں تے گالھ کرݨ سوکھا اے، لیکن انہاں دے کئی پاسے ہن جنہاں تے غور اتے توازن ضروری اے۔ انہاں آکھیا جو اساݙی حکومت پہلی واری ٹیرف کمیٹی کوں باقاعدہ منظم کیتا اتے سیکٹورز دی تعداد پہلی پالیسی اچ 13 توں ودھا تے 17 کر ݙتی ڳئی اے۔ جام کمال خان آکھیا جو انہاں آپ سارے سیکٹورز دے نال انڄ انڄ ملاقاتاں کیتی، انہاں دی تجویزا ں ڳھدیاں اتے مسئلیاں دی نشاندہی کیتی تانجو انہاں دا موثر حل کݙھیا ونڄ سڳے۔ ٻیا آکھیا جو نیشنل ٹیرف کمیشن ہک اہم ادارہ اے، تاہم ایں دی استعداد کار کوں ماضی اچ کہیں ویلھے نئیں ودھایا ڳیا ہا۔ وفاقی وزیر وضاحت کیتی جو بہوں سارے آئٹمز ایجھے ہن جو پاکستان اچ بݨدے ای نئیں، مگر انہاں تے ٹیرف برقرار رکھیا ڳیا ہا۔ حکومت انہاں سارے آئٹمز دا جائزہ ڳھدا اتے کئی چیزاں تے ٹیرف گھٹ کیتا۔ جام کمال خان آکھیا جو ٹیڈاپ دا ڈھانچہ ماضی اچ صرف بورڈ تئیں محدود ہا، مگر پہلی واری سب کمیٹیاں بݨائی ڳئیاں ہن۔ ایں طرحاں، ٹی ڈیپ اتے ای ڈی ایف اچ ورھیاں توں اصلاحات نئیں تھیاں، اساݙھے تریڄھے سال دی سابقہ حکومت اچ وی اے اصلاحات نئیں کیتی ڳئی۔ وزارتِ تجارت اچ ہیڈ آف ریسرچ اتے ہیڈ آف کمپلائنس جیڑھے اہم عہدے خالی پئن، جنہاں کوں اساݙی حکومت پہلی واری پورا کیتا۔ انہاں آکھیا جو مسئلیاں دی نشاندہی اتے انہاں دے حل کیتے عملی اقدامات ضروری ہن، اتے ہݨ او اقدامات جاری پئن تانجو صنعت تے تجارت دے شعبے کوں موثر سپورٹ فراہم کیتی ونڄ سڳے۔