وفاقی وزیر داخلہ محسن نقوی نال امریکی کوآرڈینیٹر برائے انسداد دہشت گردی گریگوری لوگرفو دی ملاقات

اسلام آباد۔15اگست (اے پی پی) وفاقی وزیر داخلہ محسن نقوی نال امریکی کوآرڈینیٹر برائے انسداد دہشت گردی گریگوری لوگرفو ملاقات کیتی جئیں اچ پاک امریکہ تعلقات، انسداد دہشت گردی، بارڈر سکیورٹی، انسداد منشیات سودھے مختلف شعبیاں اچ تعاون ودھاوݨ تے اتفاق تھیا۔ خمیس کوں وزارت داخلہ توں جاری بیان موجب وزیر مملکت داخلہ طلال چوہدری، قائم مقام امریکی سفیر نیٹلی بیکر اتے وفاقی سیکرٹری داخلہ وی ایں موقع تے موجود ہن۔ امریکی کوآرڈینیٹر برائے انسداد دہشت گردی گریگوری لوگرفو پاکستان دے 78ویں یوم آزادی تے وزیر داخلہ محسن نقوی اتے پاکستانی قوم کوں مبارخ ݙتی۔ ملاقات اچ انسداد دہشت گردی اتے انسداد منشیات دے شعبیاں اچ معلومات دے تبادلیاں کوں موثر بݨاوݨ تے وی اتفاق تھیا۔ وزیر داخلہ محسن نقوی آکھیا جو صدر ڈونلڈ ٹرمپ دی حکومت آوݨ دے بعد پاک امریکہ تعلقات اچ غیر معمولی بہتری آئی اے، امریکی صدر ڈونلڈ ٹرمپ دی عالمی امن کیتے مخلصانہ کوششاں قابل تعریف ہن، پاک امریکہ تعلقات اچ شفافیت، آپسی یقین اتے تعاون دا عنصر نشابر اے۔ محسن نقوی آکھیا جو بہترین موقع اے جو آپسی تعلقات کوں ہر شعبے اچ ودھایا ونڄے، انسداد دہشت گردی ڈائیلاگ نال سانجھا لائحہ عمل بݨاوݨ اچ مدد ملسی۔ انہاں آکھیا جو امریکہ ولوں کالعدم بی ایل اے اتے کالعدم مجید بریگیڈ کوں عالمی دہشت گرد تنظیماں قرار ݙیوݨ ہک چنڳاں اقدام اے، دہشت گردی دے خاتمے کیتے پاک امریکہ تعاون دے مثبت نتیجے سامݨے آسن۔ گریگوری لوگرفو آکھیا جو پاکستان جیو سٹریٹجک اعتبار نال بہوں اہم ملک اے۔ انہاں دہشت گرد حملیاں اچ جانی ضیان تے افسوس کیتا۔