پاکستان ٹیکسٹائل دے شعبے اچ چین دی ترقی اتے مہارت توں فیدہ چاوݨ چاہندے، وزیراعظم محمد شہباز شریف

اسلام آباد۔15اگست (اے پی پی) وزیراعظم محمد شہباز شریف خصوصی اقتصادی زون اچ چینی کمپنی دی سرمایہ کاری دا خیر مقدم کریندیں ہوئیں آکھیا جو ایں خصوصی اقتصادی زون دے قیام نال ٹیکنالوجی دی منتقلی، سکل ڈویلپمنٹ اتے پائیدار صنعتی ترقی اچ مدد ملسی، پاکستان ٹیکسٹائل دے شعبے اچ چین دی ترقی اتے مہارت توں فیدہ چاوݨ چاہندے۔ وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف نال گارمنٹس انڈسٹری نال جُڑیا ہویا چینی گروپ چیلنج فیشن پرائیویٹ لمیٹڈ دے وفد خمیس کوں اتھاں ملاقات کیتی۔ وفد دی قیادت چیلنج فیشن پرائیویٹ لمیٹڈ دے چیئرمین ہوآنگ وئیگو کیتی۔ ملاقات اچ وفاقی وزیر منصوبہ بندی احسن اقبال، وفاقی وزیر تجارت جام کمال، وفاقی وزیر اطلاعات تے نشریات عطاء اللہ تارڑ، وفاقی وزیر پٹرولیم علی پرویز ملک، وفاقی وزیر پاور ڈویژن سردار اویس احمد لغاری، وزیراعظم دے معاون خصوصی طارق فاطمی اتے متعلقہ اُچے سرکاری افسر وی موجود ہن۔ وزیراعظم وفد نال گالھ مہاڑ کریندیں ہوئیں آکھیا جو چین اتے پاکستان دی دوستی دنیا اچ ہک منفرد مقام رکھیندی اے، ݙوہیں ملک ہر اوکھ اچ ہک ݙوجھے دے نال کھڑے رہیے ہن، حکومت پاکستان چین-پاکستان دوستی کوں نویں بلندیاں تے گھن ونڄݨ چاہندی اے۔ انہاں ݙوہیں ملکاں دے اقتصادی تعلقات اچ ودھارے تے اطمینان دا اظہار کریندیں ہوئیں آکھیا جو چین-پاکستان اقتصادی راہداری دے صنعتی حصے دے ودھارے کیتے پر عزم ہن۔ وزیراعظم ایں خواہش دا اظہار کیتا جو چینی صنعتاں پاکستان اچ آپݨے یونٹس لاون۔ انہاں چیلنج فیشن گروپ دے پاکستانی مارکیٹ تے یقین کوں سراہندیں ہوئیں آکھیا جو او چیلنج گروپ ولوں پاکستان اچ خصوصی اقتصادی زون دا خیر مقدم کریندن، ایں خصوصی اقتصادی زون دے ذریعے ٹیکنالوجی ٹرانسفر، سکل ڈویلپمنٹ اتے پائیدار صنعتی ترقی اچ مدد ملسی۔ وزیراعظم خصوصی اقتصادی زون دے حوالے نال چیلنج گروپ کوں ہر ممکن سہولتاں فراہم کرݨ دی ہدایت کریندیں ہوئیں آکھیا جو پاکستان ٹیکسٹائل دے شعبے اچ چین دی ترقی اتے مہارت توں فیدہ چاوݨ چاہندے۔ انہاں آکھیا جو چین اچ چین-پاکستان بزنس-ٹو-بزنس کانفرنس ویسی، اے کانفرنس چین اتے پاکستان دے نجی کاروباری اداریاں کوں سانجھے داری دا ہک موقع ݙیسی۔ چیئرمین چیلنج فیشن گروپ پاکستان اچ شاندار میزبانی تے وزیراعظم دا شکریہ ادا کریندیں ہوئیں وزیراعظم کوں ݙسیا جو چیلنج فیشن گروپ 2014 توں ہݨ تئیں پاکستان اچ 17 ملین امریکی ڈالرز دی سرمایہ کاری کر چکی اے، چیلنج فیشن گروپ پاکستان اچ ہک جدید ٹیکسٹائل انڈسٹری اتے خصوصی اقتصادی زون قائم کریندا پئے۔ انہاں آکھیا جو ایں خصوصی اقتصادی زون نال 5 سالاں اچ 100 ملین امریکی ڈالرز دی سرمایہ کاری کیتی ویسی جئیں دے نتیجے اچ 400 ملین امریکی ڈالر دی برآمدات دی امید اے۔ ملاقات دے بعد وزیراعظم چیلنج گروپ خصوصی اقتصادی زون دا افتتاح وی کیتا۔