وفاقی وزیرخزانہ و محصولات دی زیر صدارت ہکے ݙینھ اچ ترائے اہم اجلاس، سرکاری منصوبیں دی پیش رفت دا جائزہ ڳھدا ڳیا

اسلام آباد۔15اگست (اے پی پی) وفاقی وزیر خزانہ و محصولات سینیٹر محمد اورنگزیب خمیس کوں ترائے اہم سرکاری منصوبیں دی پیش رفت دا جائزہ گھنݨ کیتے مسلسل ترائے اجلاس دی صدارت کیتی۔ اے منصوبے آندے کجھ ہفتے اچ وزیراعظم دے وژن اتے ہدایت موجب شروع کیتے ویسن تاں جو انہاں دے صحیح ویلھے تے شروع تھیوݨ کوں یقینی بݨایا ونڄ سڳے۔ اے منصوبے جیڑھے سماجی اثرات پیدا کرݨ اتے قومی ترقیاتی اہداف کوں اڳوں ودھاوݨ کیتے تیار کیتے ڳئن، متعلقہ وزارتاں، ریگولیٹری اداریں، مالیاتی اداریں اتے تکنیکی سانجھے داراں دے پکے تعاون نال نافذ کیتے ویندے پئن۔ پہلے اجلاس اچ پاکستان سکلز امپیکٹ بانڈ دا جائزہ ڳھدا ڳیا، جیڑھا ملک دا پہلا نتیجے تے مبنی اتے اثر نال جُڑیا ہویا فنانسنگ دا آلہ اے جو مقامی سطح تے تیار کیتا ویندا پئے۔ اے منصوبہ وزیراعظم ولوں قائم کیتی ڳئی وزارت خزانہ دی زیر قیادت کمیٹی دے تحت بݨائے ڳئے سوشل امپیکٹ فنانسنگ فریم ورک دے تحت تشکیل ݙتا ڳئے۔ وزیر خزانہ ایں بانڈ کوں ہک “رہنما منصوبے” دے طور تے پیش کرݨ دی لوڑھ تے زور ݙتا، جو نہ صرف وختی ترقیاتی ضرورتاں کوں پورا کرے بلکہ ملکی اتے غیر ملکی سرمایہ کاراں اتے ڈونرز کوں وی اپݨے پاسے چھکے ۔ ݙوجھے اجلاس اچ نیشنل سبسٹنس فارمرز سپورٹ سکیم (NSFSS) دا جائزہ ڳھدا ڳیا، جیڑھا کساناں کیتے رسائی و مالیات دے فریم ورک دا ہک فلیگ شپ منصوبہ اے۔ ایں سکیم دے تحت 12.5 ایکڑ یا ایں توں گھٹ زمین رکھݨ آلے یا واہݨ آلے نِکے کساناں کوں بغیر ضمانت دے ڈیجیٹل بینک قرضے ݙتے ویسن۔ زمین اتے واہی دے اعداد و شمار لینڈ انفارمیشن اینڈ مینجمنٹ سسٹم (LIMS) دے ذریعے حاصل کر تے بینکاں دے کریڈٹ سکورنگ ماڈلز اچ شامل کیتے ویسن تاں جو کساناں کوں مناسب شرح سود تے قرض مل سڳے اتے مہانگے غیر رسمی قرضیں توں بچیا ونڄ سڳے۔ وزیر خزانہ آکھیا جو “اے پہلی واری اے جو خلائی ٹیکنالوجی قومی سطح تے زرعی قرضیں دے فیصلیں کوں متاثر کریسی اتے اے دیہاتی مالیات اچ ہک سنگ میل ثابت ہوسی۔ تریڄھے اجلاس اچ وزیراعظم فین ریپلیسمنٹ پروگرام دا جائزہ ڳھدا ڳئے، جیڑھا توانائی دی بچت دا ہک منصوبہ اے اتے نیشنل انرجی ایفیشنسی اینڈ کنزرویشن اتھارٹی (NEECA) اتے بینکاں دے تعاون نال تیار کیتا ڳئے ۔ ایں منصوبے دے تحت صارف آپݨے پراݨے سیلنگ فینز کوں توانائی بچاوݨ آلے جدید ماڈلز نال بدل سڳسن، اتے وزارتِ خزانہ بینکاں دی شمولیت کیتے معمولی ضمانتی فنڈ ݙیسی۔ آن لائن پورٹل دے ذریعے مکمل ڈیجیٹل عمل کوں یقینی بݨایا ڳئے جݙاں جو پکھے بݨاوݨ آلیاں مقامی کمپنیاں کوں وی شامل کیتا ڳئے جیڑھے پیداوار اچ ودھارا کر تے روزگار اتے ایس ایم ای ترقی اچ کردار ادا کریسن۔ وزیر خزانہ آکھیا جو “اے منصوبہ صرف پکھے بدلݨ دا نئیں بلکہ توانائی دی بچت کوں گھریلو فیصلیں اچ شامل کرݨ دا اے۔ وزیر خزانہ تریجھے منصوبیں دے وختی شروع تھیوݨ تے زور ݙیندیں سارے متعلقہ وزارتاں، محکمہ جات اتے سانجھے دار اداریں کوں ہدایت کیتی جو او اڳوں آندے کجھ ہفتے اچ انہاں منصوبیں کوں مکمل کرݨ دی رفتار تکھی کرن۔ انہاں آکھیا جو انہاں منصوبیاں دی صحیح ویلھے تے تکمیل حکومت دی کارکردگی، عوامی خدمت اتے نتیجے ݙیوݨ دے عزم دا واضح سنیھا ݙیسی۔ وزیر خزانہ آکھیے جو اے منصوبے نہ صرف پاکستان بلکہ عالمی سطح تے قابلِ توسیع ماڈل دے طور تے پیش کیتے ونڄ سڳدن اتے انہاں دی موثر تکمیل نال دنیا کوں اے سنیھا ملسی جو پاکستان تیار اے، ایجاد کیتے، سانجھے داری کیتے اتے آپݨے عوام کیتے حقیقی نتیجے ݙیوݨ کیتے تیار ہن۔