دریائے چناب اچ ہیڈ محمد والا، شیر شاہ اتے جلالپور پیر والہ دے علاقیاں اچ وݙا سیلاب، ریڈ الرٹ جاری، شہریاں کوں کڈھݨ کیتے پاک فوج اتے نیوی دی خدمتاں حاصل کر ڳھدی ڳئن

ملتان۔ 09 ستمبر (اے پی پی) دریائے چناب اچ ہیڈ محمد والا، شیر شاہ اتے جلالپور پیر والہ دے علاقیاں تے وݙے سیلاب دی صورتحال پیدا تھی ڳئی اے۔ ضلعی انتظامیہ خطرے پاروں ریڈ الرٹ جاری کر ݙتے اتے متاثرہ علاقیاں اچ لوکاں کوں کݙھݨ دا عمل تیز تھی ڳئے۔ ڈپٹی کمشنر وسیم حامد سندھو ݙسایا جو شہریاں دے محفوظ انخلاء کیتے پاک فوج اتے نیوی دی خدمتاں وی حاصل کر ڳھدی ڳئن جݙاں جو او مسلسل تریجھے ݙینھ تئیں جلالپور پیر والہ اچ رہ تے امدادی سرگرمیاں دی نگرانی کریندے پئن۔ انہاں دا آکھݨ ہا جو ہیڈ تریموں توں پنج لکھ کیوسک دا ریلا ہیڈ محمد والا پڄݨ پاروں پاݨی دی سطح تیزی نال ودھدی پئی اے۔ وݙے لیول دے سیلاب دی صورت اچ شیر شاہ روڈ کوں ٻھنݨ دا فیصلہ کیتا ویسی تاں جو مزید نقصان توں بچیا ونڄ سگے ۔ گزریل 24 گھنٹیاں اچ جلالپور پیر والہ توں ݙو ہزار توں ودھ لوکاں کوں ریسکیو کر تے محفوظ علاقیاں اچ منتقل کیتا ڳئے۔ ڈپٹی کمشنر ݙسایا جو دریائے ستلج اتے چناب دے ریلیاں دے باعث جلالپور پیر والہ کوں بہوں خطرناک قرار ݙتا ڳئے اتے آندے 24 گھنٹیاں تئیں ایمرجنسی صورتحال برقرار رہسی۔ ایں دوران ٻئے پنج فلڈ ریلیف کیمپ قائم کر ݙتے ڳئن جتھاں متاثرین کیتے خوراک، دوائیاں اتے رہائش دا انتظام کیتا ڳئے۔ مکیناں توں اپیل کیتی ڳئی اے جو او ویلھے تے محفوظ علاقیاں اچ منتقل تھی تے آپݨی اتے آپݨے گھر آلیاں دی جاناں کوں محفوظ بݨاون۔