میجر عدنان اسلم شہید دی نماز جنازہ ادا، وزیراعظم، آرمی چیف فیلڈ مارشل سید عاصم منیر دی شرکت

راولپنڈی۔9ستمبر(اے پی پی)ٻنوں اچ 2 ستمبر کوں بھارتی پراکسی فتنہ الخوارج دا بہادری نال مقابلہ کریندے شدید زخمی تھیوݨ آلے میجر عدنان اسلم کمبائنڈ ملٹری ہسپتال اچ علاج ویلھے شہید تھی ڳن جنہاں دی نماز جنازہ چکلالہ راولپنڈی اچ ادا کر ݙتی ڳئی۔ آئی ایس پی آر توں جاری بیان دے مطابق، وزیر اعظم محمد شہباز شریف، وزیر دفاع خواجہ محمد آصف، وزیر اطلاعات ونشریات عطا اللہ تارڑ، آرمی چیف فیلڈ مارشل سید عاصم منیر، حاضر سروس فوجی اتے سول افسران اتے شہید دے لواحقین شہید دے نماز جنازہ اچ شرکت کیتی۔ میجر عدنان اسلم دی عمر 31 سال، راولپنڈی دے واسی ہن جنہاں اپݨے جواناں دی فرنٹ توں قیادت کریندے بے مثال بہادری نال شہادت کوں ڳل لایا۔ وزیر اعظم انہاں دی بہادری کوں خراج تحسین پیش کریندے آکھیا جو اڄ اساں دھرتی دا ہک بہادر پُتر انڄا ݙتے جیندی ہمت اتے قربانی ہمیشہ قوم دے دلاں اچ سدی رہسی، اے تکڑے عزم، وطن نال محبت اتے قربانی دا عظیم جذبہ پاکستان دی بہترین نمائندگی کریندے۔ میجر عدنان دی شہادت اے گواہی اے جو پاکستان دی مسلح افواج ہر قسم دی دہشت گردی کوں منݙھو مکاوݨ کیتے پرعزم ہین۔ میجر عدنان اسلم شہید کوں پورے فوجی اعزاز نال آبائی وستی اچ دفنا ݙتا ڳیا۔