جلالپور پیروالہ کوں سیلاب توں بچاوݨ کیتے ضلعی انتظامیہ دے ہنگامی اقدامات جاری، ہزاراں ٹٻر محفوظ ڄہیں تے پڄا ݙتے ڳئے

ملتان۔ 11 ستمبر (اے پی پی) جلالپور پیروالہ کوں تباہ کن سیلابی ریلیاں توں بچاوݨ کیتے ضلعی انتظامیہ ولوں وڈے پیمانے تے ہنگامی اقدامات جاری ہن۔ ڈپٹی کمشنر وسیم حامد سندھو دی ہدایت تے ضلع بھر دی ساری نجی کشتیاں کرائے تے گھن تے امدادی کارروائیاں اچ شامل کر گھدی ڳئن تانجو پاݨی اچ گھرے لوکاں کوں فوری کڈھیا ونڄ سگے. انتظامیہ موجب عنایت پور اتے خان بلبل فلڈ بند تے دباؤ گھٹ کرݨ کیتے گاوان روڈ تے حفاظتی بریچ کم کیتا ڳئے جئیں نال سیلابی دباؤ اچ نمایاں گھٹکی تھئی اے، بھل ہیڈ تریموں توں نکلݨ آلی ریلی جلالپور پیروالہ کیتے مسلسل خطرہ بݨی ہوئی اے۔ وستی برار فلڈ بند اچ پئے شگاف کوں بھرݨ دا عمل وی شروع کر ݙتا ڳئے تانجو شہر کوں براہ راست نقصان توں بچایا ونڄ سگے. ڈپٹی کمشنر ݙسائے جو ہݨ تئیں ہزاراں خانداناں کوں محفوظ ڄہیں تے منتقل کر گھدا ڳئے، جݙاں جو آندے 24 گھنٹیاں اچ پاݨی دی سطح ٻئی گھٹ تھیوݨ دا امکان ظاہر کیتا ویندا پئے۔ شہر دے مختلف علاقیاں اچ ہنگامی فلڈ ریلیف کیمپس قائم کیتے ڳئن جتھاں متاثرہ لوکاں کوں طبی امداد اتے پناہ فراہم کیتی ویندی پئی اے۔ سیلاب متاثراں تئیں خشک راشن دی پڄائی کیتے ہیلی کاپٹراں دا استعمال وی جاری اے۔ ضلعی انتظامیہ واضح کیتے جو کہیں کوں کلھا نہ چھوڑیا ویسی اتے سارے وسائل متاثرہ عوام دی خدمت کیتے وقف ہن۔