دریائے چناب اچ پاݨی دی سطح گھٹ تھیوݨ پئے ڳئی اے

ملتان۔ 12 ستمبر (اے پی پی)  دریائے چناب اچ آوݨ آلے سیلابی ریلے دے نویں اعداد و شمار جاری کر ݙتے ڳئن جئیں موجب دریائے چناب اچ پاݨی دی سطح اچ بتدریج گھٹکی تھیندی پئی اے۔ فلڈ کنٹرول سینٹر دے مطابق جمعہ کوں سویل اٹھ وڄے تئیں ملݨ آلے ڈیٹا دے مطابق ہیڈ محمد والا توں 60 کلومیٹر اُتے، راوی اتے چناب دے سنگم اُتے پاݨی دی سطح 440.08 فٹ ریکارڈ کیتی ڳئی، جو پہلے فریشٹ دے ودھ توں ودھ لیول (442.90 فٹ) توں 2.82 فٹ گھٹ اے جݙاں جو ایں دا رجحان مسلسل گھٹکی دے پاسے اے۔ ایں طرح اہم گیج ہیڈ محمد والا آر ڈی 11+300 (اکبر فلڈ بند) اُتے پاݨی دی سطح 411.58 فٹ ریکارڈ کیتی ڳئی اے، جو پہلے فریشٹ دے ودھ توں ودھ لیول (413.90 فٹ) توں 2.32 فٹ گھٹ اے اتے ایں دا رجحان وی گھٹکی دے پاسے اے۔ فلڈ کنٹرول سنٹر ݙسایا جو اڄوکے اعداد و شمار چنڳے ہن، کیوںجو پاݨی دی سطح اچ گھٹکی نال نِکے علاقیاں اچ خطرے گھٹ تھیندے پئن، جڈانجو ضلعی انتظامیہ اتے ریسکیو ادارے ہݨ وی ہائی الرٹ ہن تاںجو کہیں وی ممکنہ ایمرجنسی دی صورتحال نال نبڑیا ونڄ سڳے۔