قطر تے اسرائیلی جارحیت اشتعال انگیز، عالمی قانون اتے اقوام متحدہ دے چارٹر دی کھلی خلاف ورزی اے، ترجمان دفتر خارجہ دی پریس بریفنگ

اسلام آباد۔12 ستمبر(اے پی پی)پاکستان ٻھرا ملک قطر دے خلاف اسرائیلی جارحیت دی سخت مذمت کریندے آکھیے جو اے حملہ ٻہوں اشتعال انگیز اتے قطر دی خودمختاری دے نال نال بین الاقوامی قانون، اقوام متحدہ دے چارٹر اتے بین الریاستی تعلقات دے اصولاں دی کھلی خلاف ورزی اے۔ ترجمان دفتر خارجہ شفقت علی خان پریس بریفنگ اچ آکھیا جو پاکستان ایں بلا اشتعال اتے غیر قانونی جارحیت دے خلاف قطر دے نال مکمل یکجہتی کریندے، اسرائیل ولوں اے کارروائی بین الاقوامی امن اتے سلامتی کوں مسلسل نظر انداز کرݨ اتے خطے کوں غیر مستحکم کرݨ دی ایندی پالیسی دی ہک ٻئی مثال اے، پاکستان مسلسل آہدا آئے جو عالمی برادری کوں اینڄھی چھوٹ برداشت نئیں کرݨی چاہیدی، اساں قطر دی خودمختاری اتے علاقائی سالمیت دی حمایت اچ آپݨے اصولی موقف دی توثیق کریندے ہیں اتے عالمی برادری توں مطالبہ کریندے ہیں جو او اسرائیل کوں جوابدہ ٻݨاوے، پاکستان قومی خودمختاری اتے سلامتی دے دفاع اچ برادر عوام اتے قطر دی قیادت دے نال کھڑا رہسی۔ انہاں آکھیا جو وزیراعظم محمد شہباز شریف دوحہ تے حالیہ اسرائیلی حملے تے قطر دی عوام اتے قیادت نال یکجہتی کیتے قطر دا سرکاری دورہ کیتے، وزیراعظم 9 ستمبر کوں دوحہ تے اسرائیلی حملے دی پاکستان ولوں شدید مذمت کریندے ایکوں قطر دی خودمختاری اتے علاقائی سالمیت دی کھلی خلاف ورزی قرار ݙتا۔ انہاں قطری قیادت کوں ایں بلا جواز اشتعال انگیزی دے خلاف پاکستان دی مکمل یکجہتی اتے حمایت دا یقین ݙیوایا۔ انہاں اسرائیل دے ایں وحشیانہ اتے گھنائونے حملے اچ قیمتی جاناں دے ضیان تے افسوس کیتا اتے زور ݙتا جو مشرق وسطیٰ اچ اسرائیلی جارحیت کوں روکݨا ہوسی اتے امت مسلمہ کوں اسرائیلی اشتعال انگیزیاں دے مقابلے اچ آپݨیاں صفاں اچ اتحاد دی لوڑھ اے۔ ترجمان ݙسایا جو وزیراعظم آکھیے جو قطر دی درخواست تے پاکستان مشرق وسطیٰ دی صورتحال تے غور کیتے اقوام متحدہ دی سلامتی کونسل دا ہنگامی اجلاس سݙݨ دی درخواست کیتی ہئی۔ انہاں 15 ستمبر کوں غیر معمولی عرب اسلامی سربراہی اجلاس دی میزبانی دے قطر دے فیصلے دا وی خیرمقدم کیتے۔