مینز ٹی 20 ایشیا کپ دے دلچسپ مقابلے متحدہ عرب امارات اچ جاری، بنگلہ دیش اتے افغانستان منگل کوں آپت اچ کھیݙسن

دبئی۔15ستمبر (اے پی پی) مینز ٹی 20 ایشیا کپ دے دلچسپ مقابلے متحدہ عرب امارات اچ جاری ہن، ایں سلسلے اچ منگل کوں ہک میچ کھیݙیا ویسی۔ ٹورنامنٹ دے نوویں میچ اچ بنگلہ دیش اتے افغانستان دی ٹیماں کل (منگل ) کوں شیخ زید سٹیڈیم، ابوظہبی اچ کھیݙسن۔ میچ ابو ظہبی دے شیخ زید کرکٹ سٹیڈیم اچ شام 7 وج تے 30 منٹ تے شروع تھیسی۔ ٹورنامنٹ اچ 8 ٹیماں ٹائٹل کیتے کوشش کریندی پئن، جہناں ݙو گروپاں اچ ونݙیا ڳئے ۔ گروپ اے اچ پاکستان دے نال بھارت، عمان اتے متحدہ عرب امارات جݙاں جو گروپ بی اچ سری لنکا، بنگلہ دیش، افغانستان اتے ہانگ کانگ شامل ہن۔ پاکستان دی ٹیم آپݨا تریجھا میچ 17 ستمبر کوں متحدہ عرب امارات دے خلاف کھیݙسی۔ ݙوہیں گروپاں توں ݙو، ݙو ٹیماں سپر فور مرحلے اچ ڄاہ بݨیسن اتے انہاں وچال ݙو ٹیماں 28 ستمبر کوں فائنل کھیݙسن۔ ٹورنامنٹ دے میچ دبئی اتے ابو ظہبی اچ شیڈول ہن۔ واضح رہے جو ایشیا کپ ایندے توں پہلے 2016 اتے 2022 اچ وی ٹی 20 فارمیٹ اچ کھیݙیا ڳیا ہا، 2016 اچ بھارت اتے 2022 اچ سری لنکا فاتح رہیا۔ پاکستان اے ایونٹ ہنڑ تئیں ݙو واری (2000 تے 2012) جتیے جݙانجو بھارت 8 اتے سری لنکا 6 واری چیمپئن بݨ چکیے۔