وزیراعظم دی زیر صدارت اجلاس، متعلقہ اداریاں کوں سیلاب توں تھیوݨ آلے نقصاناں دا جامع اندازہ لاوݨ دی ہدایت

اسلام آباد۔ 16 ستمبر(اے پی پی)وزیراعظم محمد شہباز شریف متعلقہ اداریاں کوں سیلاب اَتے بارش زدہ علاقیاں اچ جانی اَتے مالی نقصان، فصلاں، ذرائع مواصلات اَتے مال مویشیاں کوں تھیوݨ آلے نقصاناں دا جامع اَتے حقیقی اندازہ لاوݨ دی ہدایت کریندے آکھیے جو ایں پورے اندازے دے بعد ہی حکومت بحالی دے کماں دی جامع حکمت عملی ٻݨیسی۔ سیلاب زدہ علاقیاں اچ مناسب فصلاں دی کاشت کیتے وی خاص اقدامات کیتے ویسن۔ سارے وزراء اَتے متعلقہ ادارے سیلاب زدہ علاقیاں اَتے لوکاں دی بحالی دے مرحلے اچ عوام دے نال کھڑن۔ انہاں اے ڳالھ شدید بارشاں اَتے حالیہ سیلاب پاروں پورے ملک اچ نقصاناں دے ازالے کیتے تھیوݨ آلے جائزہ اجلاس دی صدارت کریندے آکھی۔ اجلاس اچ نائب وزیراعظم اَتے وزیر خارجہ سینیٹر محمد اسحاق ڈار، وفاقی وزیر موسمیاتی تبدیلی ڈاکٹر مصدق ملک، وفاقی وزیر منصوبہ بندی و ترقی احسن اقبال، وفاقی وزیر اطلاعات و نشریات عطاء اللہ تارڑ، وفاقی وزیر اقتصادی امور ڈویژن احد خان چیمہ، ساریاں صوبیاں دے چیف سیکرٹریز، چیئرمین این ڈی ایم اے لیفٹیننٹ جنرل انعام حیدر ملک اَتے بئے متعلقہ سرکاری اداریاں دے عہدیداراں شرکت کیتی۔ اجلاس اچ وزیراعظم کوں چیئرمین این ڈی ایم اے سودھا ٻئے متعلقہ اداریاں ولوں سیلابی صورتحال اچ ہݨ تئیں کیتے گئے تعمیر و بحالی دے کماں تے بریفنگ ڈتی گئی۔ وزیراعظم کوں ڈسایا گیا جو گنے، کپاہ اَتے چاول دیاں فصلاں دے نقصاناں دا اندازہ لاوݨ تے کم شروع کر ڈتا گئے اَتے اگلے ݙاہ توں پندرھاں ڈینھ اچ پاݨی دی مقدار گھٹ تھیوݨ تے اے کم پورا تھی ویسی۔ وزیراعظم سارے متعلقہ اداریاں کوں سیلاب اَتے بارش زدہ علاقیاں اچ جانی و مالی نقصاناں، فصلاں، ذرائع مواصلات اَتے مال مویشیاں اچ تھیوݨ آلے نقصاناں دا جامع اَتے حقیقی اندازہ لاوݨ دی ہدایت کیتی۔ وزیراعظم محمد شہباز شریف آکھیا جو مکمل اندازے دے بعد ہی حکومت بحالی دے کماں دی جامع حکمت عملی ٻݨیسی تاں جو مؤثر طریقے نال متاثرہ علاقیاں اَتے لوکاں دی بحالی تے کم کیتا ونڄ سگے، سارے صوبے اَتے متعلقہ ادارے ملک اچ سیلابی صورتحال اَتے حالیہ بارشاں پاروں نقصاناں دا تفصیلی اندازہ لاون تاں جو بحالی کیتے واضح اَتے مؤثر لائحہ عمل اختیار کیتا ونڄے، وزیراعظم آکھیا جو ساریاں وزراء اعلیٰ بارشاں اَتے حالیہ سیلاب سانڳے صورتحال کوں ویلھے سر اَتے مؤثر طریقے نال حل کرݨ کیتے بھرپور اقدامات کیتن جیڑھے تعریف دے لائق ہن، وفاقی اَتے بین الصوبائی ادارے نقصاناں دے اندازے اچ ہک ڈوجھے نال بھرپور تعاون کرن، بارشاں اَتے حالیہ سیلاب دے نقصاناں دے جائزے اچ جانی و مالی نقصان دے علاوہ فصلاں دی تباہی اَتے مال مویشی دے نقصاناں کوں وی ڳݨیا ونڄے۔ وزیراعظم آکھیا جو سپارکو توں سیٹلائٹ اسیسمنٹ اچ مدد گھدی ونڄے، فصلاں کوں سیلاب دے بعد مختلف بیماریاں توں بچاوݨ، سیلاب زدہ علاقیاں اچ مناسب فصلاں دی کاشت، ذرائع مواصلات دی بحالی اَتے متاثرہ سڑکاں دی تعمیر و مرمت کوں پہلی ترجیح ڈتی ونڄے۔ وزیراعظم شہباز شریف ہدایت کیتی جو سارے وزراء اَتے متعلقہ ادارے سیلاب زدہ علاقیاں اَتے لوکاں دی بحالی دے مرحلے اچ عوام دے نال کھڑن، سارے وفاقی اَتے متعلقہ صوبائی اداریاں کوں آپسی ہک مٹھ اَتے بھرپور تعاون نال کم کرݨا چاہیدے۔