وزیراعظم محمد شہباز شریف سعودی عرب دے سرکاری دورے تے ریاض پُڄ ڳئن

ریاض۔17ستمبر (اے پی پی)وزیراعظم محمد شہباز شریف سعودی ولی عہد شہزادہ محمد بن سلمان دی دعوت تے سعودی عرب دے سرکاری دورے تے ریاض پُڄ ڳئن۔ کنگ خالد ایئرپورٹ ریاض پُڄݨ تے ریاض دے نائب گورنر محمد بن عبد الرحمن بن عبدالعزیز، پاکستان اچ سعودی عرب دے سفیر نواف بن سعید المالکی، پاکستان دے سعودی عرب اچ سفیر احمد فاروق اتے اعلیٰ سفارتی حکام وزیراعظم اتے پاکستانی وفد دا استقبال کیتا. وزیراعظم دے ریاض پُڄݨ تے پورے شہر اچ پاکستان دے جھنڈے لہرائے ڳن۔ ایں موقع تے وزیراعظم کوں 21 توپاں دی سلامی ݙتی ڳئی اتے سعودی عرب دیاں مسلح فوجاں دے دستے انہاں کوں گارڈ آف آنر پیش کیتا۔ ایں توں پہلے، وزیراعظم محمد شہباز شریف دے جہاز دا سعودی عرب دی فضائی حدود اچ داخل تھیوݨ تے سعودی فضائیہ دے لڑاکا طیاریاں شاندار استقبال کیتا۔ وزیراعظم دا جہاز جیویں ہی سعودی فضائی حدود اچ وڑیے تاں سعودی فضائیہ دے ایف 15 لڑاکا طیاریاں وزیراعظم دے جہاز کوں آپݨے گھیرے اچ ڳھن ڳھدا۔ وزیراعظم سعودی عرب دی فضائی حدود اچ ودھ استقبال تے سعودی عرب دے بادشاہ خادم الحرمین الشریفین شاہ سلمان بن عبدالعزیز اتے ولی عہد و وزیراعظم شہزادہ محمد بن سلمان دا شکریہ ادا کیتا۔ سعودی عرب دے سرکاری دورے اچ نائب وزیراعظم و وزیرِ خارجہ محمد اسحاق ڈار، وزیرِ دفاع خواجہ محمد آصف، وزیرِ خزانہ محمد اورنگزیب، وزیرِ اطلاعات و نشریات عطاء اللہ تارڑ، وزیرِ ماحولیات مصدق ملک اتے معاون خصوصی طارق فاطمی وی وزیراعظم دے نال ہن۔ وزیراعظم محمد شہباز شریف، سعودی ولی عہد شہزادہ محمد بن سلمان نال ملاقات کیتے شاہی دیوان، قصر یمامہ ویسن۔ قصر یمامہ اچ وزیراعظم اتے پاکستانی وفد دا باضابطہ استقبال تھیسی۔ ݙو طرفہ ملاقات اچ پاکستان اتے سعودی عرب دے تعلقات دے سارے پہلوواں دا تفصیلی جائزہ گھدا ویسی۔ ݙوہیں رہنما آپس دی دلچسپی دیاں علاقائی اتے عالمی پیشرفت تے وی گالھ مہاڑ کریسن۔ دورے اچ پاکستان اتے سعودی عرب وچال مختلف شعبیاں اچ تعاون کوں عملی شکل ݙیوݨ کیتے باضابطہ پیشرفت دی امید اے جیڑھی ݙوہاں ملکاں دے دیرینہ برادرانہ تعلقات کوں اڳوں ودھاوݨ دے مشترکہ عزم دی عکاسی کریندی اے۔