مظفرگڑھ وچ چھل پاروں 17 بندے جاں بحق تھئن، ڈپٹی کمشنر مظفرگڑھ

مظفرگڑھ ۔20ستمبر(اے پی پی) ڈپٹی کمشنر مظفرگڑھ عثمان طاہر جپہ ضلع مظفرگڑھ وچ چھل پاروں تھیوݨ آلے ضیان دی رپورٹ جاری کرݙتی اے ۔ انہاں آکھیے جو دریائے چناب وچ پاݨی دی سطح معمول تے آڳئی اے تے نشیبی علاقیں کنوں پاݨی لہہ ڳئے ۔ جنہاں علاقیں کنوں پاݨی لہہ ڳئے ، متاثرین چھل آپݨے گھراں واپس ونڄݨ شروع کرݙتے ۔ چھل متاثرین کیتے بݨائے ڳئے 30 فلڈ ریلیف کیمپاں وچوں 20 فلڈ ریلیف کیمپاں وچ متاثرین چھل رہندے پئن ۔ ایں ویلھے ریلیف کیمپاں وچ 16 ہزار 650 متاثرین چھل رہندے پئن ، جݙاں جو فلڈ بنداں تے لاتے ڳئے خیمیں وچ 10 ہزار 350 متاثرین ہن۔ چھل متاثرین دی امداد تے ریلیف سانڳے ضلع وچ 20 غیر سرکاری تنظیماں کم کریندیاں پئن۔ ضلعی انتظامیہ تے غیر سرکاری تنظیماں دی طرفوں روزانہ 27 ہزار توں ودھ متاثرین کوں 3 ویلھے دا ٹکر پاݨی ݙتا ویندا پئے۔ ڈپٹی کمشنر ضیان دی تفصیل ݙیندے آکھیے جو ہݨ تائیں دی اطلاعات موجب چھل پاروں 17 لوک جاں بحق تھیوݨ دی اطلاعات ہن۔ ضلع وچ چھل توں نکے وݙے 35 جانور ہلاک تھیوݨ دی اطلاع ملی اے۔ ڈپٹی کمشنر ݙسایا جو ابتدائی رپورٹ موجب ہݨ تائیں ضلع وچ چھل کنوں 130 سرکاری سکولاں کوں، 11 سرکاری ہسپتالاں کوں ضیان پُڄݨ دی اطلاعات ہن۔ چھل کنوں 68 سڑکاں کوں تے 37 ٻیاں سرکاری عمارتاں کوں وی ضیان پڄے ۔ انہاں ݙسایا جو اڄوکی چھل پاروں 2 لکھ 9 ہزار 378 ایکڑ زمین تے کھڑیاں فصلاں دا ضیان تھئے۔ چھل پاروں ضلع اچ 12 ہزار 322 مکان مکمل جݙاں جو 29 ہزار 254 مکانات جزوی طور تے تباہ تھئن۔ ڈپٹی کمشنر آکھیا جو ضلعی انتظامیہ، لائن ڈیپارٹمنٹ تے پاک فوج متاثرین چھل کوں چنڳاں ریلیف ݙیوݨ وچ مصروف ہن، جے تئیں فلڈ ریلیف کیمپ وچ متاثرین چھل موجود ہن، انہاں کوں 3 ویلھے دا ٹکر پاݨی تے ٻیاں سہولتاں ݙتیاں ویسن۔