وزیر اعظم محمد شہبازشریف اتے امریکی صدر ڈونلڈ ٹرمپ دی ملاقات

واشنگٹن۔26 ستمبر(اے پی پی)وزیر اعظم محمد شہبازشریف امریکی صدر ڈونلڈ ٹرمپ نال وائٹ ہائوس دے اوول آفس واشنڳٹن ڈی سی اچ ملاقات کیتی۔ اے ملاقات رات ݙیݙھ وڄے اوول آفس اچ تھئی۔ ملاقات اچ پاکستان دے اعلیٰ سطح وفد اچ فیلڈ مارشل سید عاصم منیر، وفاقی وزیر دفاع خؤاجہ محمد آصف، وفاقی وزیر داخلہ سید محسن نقوی، وزیر اطلاعات و نشریات عطا اللہ تارڑ اتے نائب وزیراعظم و وزیر خارجہ محمد اسحاق ڈار وی وزیر اعظم دے نال ہن۔ امریکی صدر ٹرمپ اتے وزیر اعظم شہباز شریف دی ملاقات اچ ݙوہاں ملکاں وچال دیرینہ تعلقات اتے مختلف شعبیاں اچ تعاون ڳھاٹا کرݨ دے اقدامات سودھا عالمی و علاقائی معاملات خاص کر مسلہ کشمیر و فلسطین، پاک سعودی دفاعی معاہدے، افغانستان اچ امن و استحکام دیاں کوششاں تے ڳالھ مہاڑ تھئی۔ وزیر اعظم شہباز شریف دی اقتدار سنٻھالݨ توں بعد امریکی صدر ڈونلڈ ٹرمپ نال اے پہلی با ضابطہ ملاقات اے۔ وزیر اعظم شہباز شریف امریکی صدر کوں اڄوکے سیلاب توں بعد سامݨے آوݨ آلی صورتحال، خطے اچ امن کیتے جاری کوششاں، دہشتگردی دے خلاف جنگ اچ قربانیاں دا ݙسیندے غزہ دی صورتحال تے اپݨا چنتا ݙسیا۔ امریکی صدر پاکستان اچ بارشاں اتے سیلاب نال تھیوݨ آلے وݙے جانی اتے مالی ضیان تے افسوس کیتے اتے نال ہی سعودی عرب اتے پاکستان وچال تھیوݨ آلے دفاعی معاہدے تے مبارک ݙتی۔ انہاں آکھیا جو میں ڄڳ اچ امن چاہنداں، پاک بھارت جنگ سودھا ست مختلف جنگاں رکواوݨ اچ اہم کردار ادا کیتے، چاہنداں جو غزہ دا بحران وی تیکھے حل تھیوے، امید اے جو غزہ دے معاملے تے تیکھے معاہدہ توڑ پج ویسی۔ ایں توں پہلے ینڈریوز ایئر بیس پڄݨ تے وزیرِاعظم شہبازشریف دا ریڈ کارپٹ تے امریکی ایئر فورس دے اعلیٰ عہدیدار استقبال کیتا۔ وزیرِاعظم محمد شہبازشریف موٹرکیڈ امریکی سکیورٹی دے حصار اچ ایئربیس توں اوول آفس پڄین جتھاں امریکی وزیر خارجہ مارکو روبیو انہاں دا استقبال کیتا۔ ایں موقع تے امریکا اچ پاکستان دے سفیر وی موجود ہن۔ یاد راہوے جو وزیر اعظم شہباز شریف امریکا دے دورے تے ہین جتھاں انہاں اقوام متحدہ جنرل اسمبلی دے 80 ویں اجلاس اچ وی شرکت کیتی اے اتے مختلف عالمی رہنماواں نال وی ملین۔ وزیر اعظم شہباز شریف واشنگٹن اچ امریکی صدر توں ملاقات دے بعد نیویارک ولسن جتھاں وزیر اعظم دا نیویارک اچ اقوام متحدہ دی جنرل اسمبلی دے 80 ویں اجلاس نال خطاب وی شیڈول اے جیندے اچ او علاقائی امن و سلامتی سودھا پورے ڄڳ اچ ترقی و خوشحالی، امن و استحکام خآص کر کشمیر اتے فلسطین دی صورتحال تے پاکستان دا موقف پیش کریسن۔