پاکستان کوں ٻیرونی سرپرستی اچ تھیوݨ آلی دہشت گردی دا سامݨا اے، آخری دہشت گرد مکݨ تئیں جنگ جاری رکھسوں، وزیراعظم شہباز شریف

نیویارک۔26ستمبر(اے پی پی):وزیراعظم محمد شہباز شریف آکھیے جو پاکستان کوں ٻاہرلی سرپرستی اچ تھیوݨ آلی دہشت گردی دا سامݨا اے، اساݙے سکیورٹی ادارے دہشت گردی دے خلاف لڑدے پئن، اساں ایں جنگ کوں آخری دہشت گرد دے خاتمے تئیں جاری رکھسوں۔ جمعہ کوں اقوام متحدہ دی جنرل اسمبلی دے 80 ویں اجلاس نال خطاب کریندے ہوئیں وزیراعظم آکھیا جو پاکستان ہر طرح دی دہشت گردی دی مذمت کریندے، پاکستان ݙو ݙہاکیاں توں ودھ عرصے توں دہشت گردی دے خلاف فرنٹ لائن ملک دے طور تے کردار ادا کریندا پئے اتے ایں سانڳے 90 ہزار جاناں دی قربانی ݙے چُکیے جنہاں اچ اساݙیاں تریمتیں، نیاݨے، بزرگ، ڈاکٹر، انجینئرز اتے ٻئے شامل ہین، نیویارک، لندن، لاہور اتے دنیا دے کہیں وی مقام تے کہیں دی زندگی ڳھنݨ ہکو جھیاں اے، پاکستان انسداد دہشت گردی اتے دنیا اچ امن دے قیام کیتے لازوال قربانیاں ݙتین، اساݙیاں انہاں قربانیاں دا اعتراف کیتا وںڄݨا چاہیدے۔ انہاں آکھیا جو دہشت گردی دی وجہ نال پاکستان 150 ارب ڈالر توں ودھ دا معاشی نقصان چا چُکیے، اڄ اساکوں ٻاہرلی سرپرستی اچ تھیوݨ آلی دہشت گردی دا سامݨا اے، ٹی ٹی پی، فتنہ الخوارج، فتنہ ہندوستان، بی ایل اے اتے ایںدے مجید بریگیڈ دے دہشت گردی دا سامݨا کریندے پئے ہیں، اے گروہ افغان سرزمین توں کم کریندن اتے جعفر ایکسپریس جھئیں خوفناک حملیاں دے ذمے وار ہن جیکوں یرغمال بݨایا ڳیا ہا ٻھل اساݙیاں مسلح افواج اتے قانون نافذ کرݨ آلے اداریاں کارروائی کر کے یرغمالیاں کوں رہا کرایا اتے دہشت گرداں کوں انہاں دے انجام تئیں پُڄایا۔ وزیراعظم آکھیا جو اساݙے سکیورٹی ادارے انہاں دہشت گرداں نال لڑدے پئن اتے اساں ایں جنگ کوں آخری دہشت گرد دے مکݨ تئیں جاری رکھسوں