صدر ٹرمپ نال ملاقات خوشگوار، انہاں امریکی کمپنیاں کوں پاکستان اچ سرمایہ کاری دے امکانات دا جائزہ گھنݨ دی ہدایت کیتی اے” وزیر اعظم محمد شہباز شریف دی صحافیاں نال گالھ مہاڑ

نیویارک۔26ستمبر(اے پی پی)وزیر اعظم محمد شہباز شریف آکھیے جو امریکی صدر ڈونلڈ ٹرمپ پاکستان کیتے خیرسگالی دے جذبات دا اظہار کریندے ہوئیں امریکی کمپنیاں کوں فوری طور تے پاکستان ونڄ تے سرمایہ کاری دا جائزہ گھنݨ دا آکھیے، انہاں دا جنگ بندی کیتے کردار جنوبی ایشیا اچ پائیدار امن کیتے اہم ہا۔ بھارت دی سرحد پار دہشت گردی دا ودھ ولدا ݙیندے پئے ہیں، غیر ملکی فنڈنگ نال دہشت گردی دی کارروائیاں کرݨ آلے دہشت گرداں اتے ایجنٹاں دا صفایا کیتا ویندا پئے۔ اقوام متحدہ دی جنرل اسمبلی دے 80 ویں اجلاس توں خطاب توں بعد صحافیاں نال گالھ مہاڑ کریندے وزیر اعظم صحافیاں کوں امریکی صدر نال تھیوݨ آلی ملاقات دا ݙسایا جو صدر ٹرمپ نال خوشگوار ماحول اچ گالھ مہاڑ تھئی اے، انہاں پاکستان کیتے خیر سگالی ݙکھائی اے، ملاقات اچ ݙو طرفہ تعلقات خاص طور تے تجارت اتے سرمایہ کاری تے گالھ مہاڑ تھئی، امریکی صدر پاکستان نال تجارتی تعلقات اتے مشترکہ منصوبیاں اچ سرمایہ کاری کیتے ودھ حوصلہ افزاء گالھ کیتی اتے امریکی کمپنیاں کوں ہدایت کیتی جو او پاکستان اچ سرمایہ کاری دے امکانات دا جائزہ گھنݨ۔ وزیر اعظم آکھیا جو امریکی کمپنیاں نال اساں مشترکہ منصوبیاں کیتے دستخط وی کیتے ہن۔ وزیر اعظم آکھیا جو صدر ٹرمپ اتے انہاں دی ٹیم پاکستان اتے بھارت وچال جنگ بند کراوݨ اچ کلیدی اتے دانشمندانہ کردار ادا کیتا، صدر ٹرمپ دا جنگ بندی دا فیصلہ جنوبی ایشیا اچ پائیدار امن کیتے اہم ہا جیںدے تے میں اپݨے پاسوں اتے پاکستان دے 24 کروڑ عوام ولوں انہاں دا ہک واری ول شکریہ ادا کیتا۔ انہاں آکھیا جو پاکستان دی حکومت اتے عوام پاک بھارت جنگ بندی اچ صدر ٹرمپ دے کردار دے معترف ہین، ڄیکر جنگ ودھدی تاں خطے اچ ٻہوں تباہی تھیوݨی ہئی، ایں کیتے امن دیاں کاوشاں تے اساں صدر ٹرمپ کوں نوبل امن ایوارڈ کیتے نامزد کیتے۔ ہک سوال دے جواب اچ انہاں آکھیا جو اساں بھارت توں جنگ جت ڳھدی، ہݨ امن جیتݨ چاہندے ہیں۔ وزیر اعظم آکھیا جو اساں بھارت دی سرحد پار دہشت گردی دا بھرپور جواب ݙیندے پئے ہیں، دہشت گرداں اتے ایجنٹاں دا صفایا کیتا ویندا پئے جیڑھے غیر ملکی فنڈنگ نال دہشت گردی دیاں کارروائیاں کریندن۔