جنوبی افریقا دے خلاف ٹیسٹ سیریز کیتے 18 رکنی قومی سکواڈ دا اعلان

لاہور۔30ستمبر(اے پی پی)قومی سلیکشن کمیٹی جنوبی افریقا دے خلاف ݙو ٹیسٹ میچاں دی سیریز کیتے 18 رکنی قومی سکواڈ دا اعلان کرݙتے۔ اے سیریز آئی سی سی ورلڈ ٹیسٹ چیمپئن شپ 2025-27 دا حصہ اے جیڑھی 12 اکتوبر توں قذافی سٹیڈیم لاہور اچ شروع تھیسی۔ شان مسعود ٹیست ٹیم دی قیادت کریسن۔ 3 نویں کھلاڑی آصف آفریدی، فیصل اکرم اتے روحیل نذیر پہلی واری سکواڈ اچ نال ہوسن۔ جنوبی افریقا پاکستان دے خلاف پہلا ٹیسٹ 12 توں 16 اکتوبر کوں لاہور اچ، ݙوڄھا ٹیسٹ 20 توں 24 اکتوبر کوں راولپنڈی کرکٹ سٹیڈیم اچ کھیݙسی۔ ݙو ٹیسٹ میچاں دے بعد ݙوہاں ٹیماں وچال 3 ٹی ٹونٹی اتے 3 ون ڈے میچز دی سیریز وی تھیسی جیڑھی 28 اکتوبر توں شروع تھیسی۔ ون ڈے ٹیم دا اعلان بعد اچ کیتا ویسی۔ پری سیریز کیمپ اچ شامل کھلاڑی (کل )بدھ توں ہیڈ کوچ اظہر محمود اتے نیشنل کرکٹ اکیڈمی دے کوچز دی زیر نگرانی ٹریننگ شروع کریسن۔ ایشیا کپ کھیݙݨ آلے کھلاڑی 4 اکتوبر کوں سکواڈ جوائن کریسن۔ پاکستان دے ٹیسٹ سکواڈ اچ شان مسعود (کپتان)، عامر جمال، عبداللہ شفیق، ابرار احمد، آصف آفریدی، بابر اعظم، فیصل اکرم، حسن علی، امام الحق، کامران غلام، خرم شہزاد، محمد رضوان، نعمان علی، روحیل نذیر، ساجد خان، سلمان علی آغا، سعود شکیل اتے شاہین شاہ آفریدی شامل ہین۔