پاکستان اتے سعودی عرب وچال تاریخی دفاعی معاہدہ ݙوہیں برادر ملکاں وچال تعلقات دے استحکام آلے پاسے اہم سنگ میل اے، وفاقی وزیرخزانہ محمد اورنگزیب دا اوآئی سی سی آئی اتے پاکستان بزنس کونسل دی تقریب توں خطاب

اسلام آباد۔10اکتوبر (اے پی پی) وفاقی وزیرخزانہ و محصولات سینیٹر محمد اورنگزیب آکھیا جو پاکستان اتے سعودی عرب وچال تاریخی دفاعی معاہدہ ݙوہیں برادر ملکاں وچال تعلقات دے استحکام آلے پاسے اہم سنگ میل اے۔  برآمدات تے مبنی ترقی دے ماڈل کوں فروغ ݙیوݨ پاکستان دی پائیدار ترقی کیتے ہک اہم ہدف اے، پاکستانی معیشت دی ترقی اچ نجی شعبہ قائدانہ کردار ادا کریسی، ڈیجیٹلائزیشن اتے ڈاکیومنٹیشن ٹیکس نیٹ کوں ودھاوݨ اتے مالی نظم و ضبط کوں چنڳا بݨاوݨ اچ کلیدی کردار ادا کریسن۔ اے ڳالھیں انہاں جمعہ کوں کراچی اچ اوورسیز انویسٹرز چیمبر آف کامرس اینڈ انڈسٹری اچ تھیوݨ آلے کاروباری اجلاس توں ویڈیو لنک دے ذریعے آپݨے خطاب اچ کیتی، انہاں آکھیا جو سعودی عرب دے کاروباری وفد دے اعزاز اچ ترتیب ݙتا ڳیا ہا۔ تقریب دی میزبانی اوورسیز انویسٹرز چیمبر اتے پاکستان بزنس کونسل مشترکہ طور تے کیتی۔ وزیر خزانہ اوورسیز انویسٹرز چیمبر اتے پاکستان بزنس کونسل دی قیادت دا شکریہ ادا کریندیں ہوئیں افسوس ظاہر کیتا جو او واشنگٹن اچ آئی ایم ایف اتے عالمی بینک دے سالانہ اجلاس اچ شرکت دی وجہ توں ذاتی طور تے تقریب اچ شریک نی تھی سڳیے۔محمد اورنگزیب ہک واری ولا ایں ڳالھ تے زور ݙتا جو پاکستانی معیشت دی ترقی اچ نجی شعبہ قائدانہ کردار ادا کریسی جݙاں جو حکومت دا کردار صرف سہولتاں فراہم کرݨ آلے ہک ماحول دی تخلیق تئیں محدود رہسی۔ وزیر خزانہ پاکستان دے چنڳے تھیندے معاشی اشاریاں تے روشنی پیندیں ہوئیں آکھیا جو معاشی استحکام بحال تھی ڳئے اتے کئی سالاں دے بعد ہݨ سارے ترائے وݙیاں عالمی ریٹنگ ایجنسیاں دے موقف اچ ہم آہنگی پاتی ویندی پئی اے۔ انہاں آکھیا جو مستحکم مالیاتی شرحاں، مستحکم زرمبادلہ دا نظام اتے مناسب ذخائر سرمایہ اتے منافع دی بیرونِ ملک منتقلی کوں ہک معمول دی کاروائی بݨا ݙتے۔ انہاں 30 ستمبر کوں 500 ملین ڈالر دے یوروبانڈ دی ویلھے سِر ادائیگی دا حوالہ ݙیندیں ہوئیں آکھیا جو جݙاں معاشی استحکام آ ونڄے تاں ایہو سویں واقعے کوئی ڈرامہ نئی رہندے بلکہ اے معمول دا حصہ بݨ ویندن۔