وینزویلا دی جمہوریت پسند رہنما ماریا کورینا مچاڈو امن دا نوبل انعام جیت ڳھدا

اوسلو۔10اکتوبر (اے پی پی) وینزویلا دی اپوزیشن رہنما ماریا کورینا مچاڈو 2025 دا نوبل امن انعام جیت ڳھدا۔ رائٹرر دے مطابق ناروے دے دارالحکومت اوسلو اچ تھیوݨ آلی تقریب اچ وینزویلا دی اپوزیشن رہنما ماریا کورینا مچاڈو کوں 2025 دا نوبل امن انعام ݙیوݨ دا اعلان کیتا ڳیا۔ نوبل کمیٹی دے مطابق امن انعام وینزویلا دی جمہوریت نواز رہنما ماریا کورینا مچاڈو دے ناں رہیا، ماریا کورینا مچاڈو کوں امن دا نوبل انعام وینزویلا دی عوام دے جمہوری حقوق کوں فروغ ݙیوݨ کیتے کوششاں اتے آمریت توں جمہوریت دی انصاف آلی تے پرامن منتقلی دی جدوجہد تے ݙتا ڳیا۔ واضح راہوے جو امریکی صدر ڈونلڈ ٹرمپ امن دا نوبل انعام آپݨے ناں کرݨ اچ ناکام رہیے۔ ایں سال نوبل امن انعام کیتے 300 توں ودھ لوکاں کوں نامزد کیتا ڳیا ہا۔