اکادمی ادبیات پاکستان اچ سابق ناظمِ اعلیٰ جناب سلطان محمد نواز ناصر دے اعزاز اچ الوداعی تقریب

اسلام آباد۔11اکتوبر (اے پی پی) اکادمی ادبیات پاکستان اچ ہک پُر وقار اتے یادگار الوداعی تقریب منعقد کیتی ڳئی، جو ادارے دے سابق ناظمِ اعلیٰ جناب سلطان محمد نواز ناصر دی خدمات دے اعتراف اتے انہاں دے اعزاز اچ رکھی ڳئی۔ ایں تقریب دی نظامت دے فرائض ناظم اکادمی جناب محمد عاصم بٹ چنڳی طرح نال اتے خوش اسلوبی نال سرانجام ݙتے جݙاں جو صدرِ محفل دی کرسی تے اکادمی دی صدر نشین، مشہور ادیبہ، مفکر اتے محقق پروفیسر ڈاکٹر نجیبہ عارف بیٹھی ہوئی ہن۔ تقریب دے آغاز اچ جناب عاصم بٹ جناب سلطان ناصر دیاں خدمات تے روشنی پَا تے آکھیا جو جناب سلطان ناصر نہ صرف اکادمی دے انتظامی معاملیاں کوں چنڳی طرح نال نبھایا بلکہ ادارے دیاں ادبی سرگرمیاں اچ وی فعال کردار ادا کیتا۔ او ہک منتظم دے نال نال ہک حساس شاعر اتے سمجھدار ادیب وی ہن، جنہاں آپݨی تخلیقی سوچ اتے علمی وابستگی دے ذریعے اکادمی کوں نویاں راہواں تے ٹوریا۔ نائب ناظم جناب اختر رضا سلیمی ایں موقعے تے آپݨے خیالاں دا اظہار کریندے ہوئیں آکھیا جو جناب سلطان ناصر ہک بہترین باس، مخلص ساتھی اتے قابلِ احترام رہنما ہن۔ انہاں نہ صرف اساں کوں انتظامی و قانونی معاملیاں دیاں باریکیاں سکھائیاں بلکہ زندگی گزارݨ دے اعلیٰ انسانی رویّاں دا درس وی ݙتا۔ انہاں نال جو پیار اتے احترام دا تعلق قائم تھیا، او ہمیشہ دلاں اچ زندہ رہسی۔ جناب سلطان محمد نواز ناصر آپݨے خطاب اچ ادارے دے سارے افسراں، عملے اتے خاص طور تے صدر نشین اکادمی پروفیسر ڈاکٹر نجیبہ عارف دا دلوں شکریہ ادا کیتا۔ انہاں دا آکھݨا ہا جو اکادمی اچ انہاں دی تعیناتی محض ہک سرکاری ذمہ واری نی ہائی، بلکہ او اتھاں کُجھ خواب، کُجھ امنگاں اتے کُجھ تخلیقی جذبے گھن تے آئے ہن۔ انہاں اتھاں صرف ویلھا گزارݨ دی بجائے، علمی و ادبی مشن اتے ہک مقصد دے تحت کَم کیتا۔ انہاں کیتے اے ہک ذاتی اتے فکری وابستگی دا سفر ہا، جیں اچ انہاں ہر ویلھے آپݨیاں ساریاں طاقتاں وقف کرݨ دی کوشش کیتی۔ انہاں آکھیا جو صدر نشین ڈاکٹر نجیبہ عارف ہر قدم تے انہاں دی راہنمائی کیتی؛ انہاں تے اعتماد کیتا اتے ہمیشہ پیار بھری سلوک رکھیا۔ انہاں دا آکھݨا ہا جو ادارے بلاشبہ بندیاں توں وݙے ہوندے ہن، پر بعض شخصیتاں آپݨے خلوص، علم اتے کردار دی وجہ توں خود ادارہ بݨ ویندیاں ہن اتے ڈاکٹر نجیبہ انہاں کجھ انمول شخصیتاں اچوں ہک ہن جنہاں توں انہاں کئی انتظامی معاملے وی سِکھیے۔ جناب سلطان ناصر مزید آکھیا جو انتظامی ذمہ واریاں اچ کݙاہیں کݙاہیں سخت فیصلے وی گھنݨے پوندے ہن، پر انہاں اچ وی اگر انسانیت، اخلاق اتے وقار شامل ہووے تاں او کوڑے نی بلکہ چنڳے بݨ ویندے ہن۔ اکادمی اچ انہاں کوں کئی چیلنجاں دا سامݨا رہیا، پر انہاں چیلنجاں دا سامݨا ہمیشہ ٹیم ورک، مشورے اتے آپس دے احترام دے جذبے نال کیتا ڳیا، اتے ایہا ادارے دی اصل رُوح ہے۔ صدر نشین اکادمی، ڈاکٹر نجیبہ عارف آپݨے خطاب اچ جناب سلطان ناصر دیاں خدمات کوں بھرپور انداز اچ سراہیا۔ انہاں آکھیا جو اگرچہ انہاں نال میݙیاں شروع دیاں ملاقاتاں گھٹ رہیاں، پر انہاں دی شہرت اتے کَم نال جُڑیا خلوص دل اچ پہلے ہی جاہ بݨا چُکیا ہا۔ انہاں دی محنت، ادارے نال غیر معمولی وابستگی اتے ذاتی فائدے توں اُتے اُٹھ تے خدمات سرانجام ݙیوݨ میݙے کیتے بہوں متاثر کرݨ آلا رہیا۔ انہاں ایں ڳالھ تے اطمینان دا اظہار کیتا جو جناب سلطان ناصر دے دور اچ اکادمی کئی اہم منصوبے پورے کیتے۔ او نہ صرف احکامات تے خوشی نال عمل کریندے رہے بلکہ ہر معاملے اچ سمجھ ݙیوݨ آلے مشورے وی ݙیندے رہے۔ ڈاکٹر نجیبہ عارف انہاں دیاں خدمات تے اکادمی دی ولوں دلوں شکریہ ادا کیتا اتے انہاں کیتے نیک تمناواں دا اظہار کیتا۔ ایں موقع تے انہاں جناب سلطان ناصر کوں اکادمی دی ولوں نشانِ اعزاز اتے پُھلاں دا گلدستہ وی پیش کیتا۔ تقریب دے اختتام تے نِکّی دعوت دا انتظام کیتا ڳیا، جتھاں سابق ناظم اعلیٰ جناب سلطان ناصر ہک ہک کر تے اکادمی دے سارے افسراں اتے عملے نال ملاقات کیتی؛ پراݨیاں یاداں کوں تازہ کیتا اتے پیار و خلوص دے ایں ماحول کوں ہک سوہݨی یاد بݨیندے ہوئیں رخصت تھئے۔ اے تقریب نہ صرف ہک ہکّلے بندے دیاں صلاحیتاں اتے خدمات دا اعتراف ہائی، بلکہ اے ادارہ جاتی ثقافت، آپس دے احترام اتے وابستگی دا او منظر ہا جیں دی جلدی اتے بہوں لوڑ ملک دے سارے ادبی اتے انتظامی اداریاں اچ ہے۔

ڈاکٹر سعدیہ کمال