ٹی 20 ورلڈ کپ 2026 کیتے 20 ٹیماں دی لائن اَپ پوری، متحدہ عرب امارات وی شامل

دبئی۔17اکتوبر (اے پی پی) انٹرنیشنل کرکٹ کونسل (آئی سی سی) دے مطابق ٹی ٹونٹی ورلڈ کپ 2026 کیتے 20 ٹیماں دی لائن اَپ مکمل تھی ڳئی اے، متحدہ عرب امارات وی میگا ایونٹ کیتے کوالیفائی کر ڳھدا۔ ٹی ٹونٹی ورلڈ کپ 7 فروری توں 8 مارچ 2026 تئیں بھارت اتے سری لنکا اچ کھیݙیا ویسی۔ آئی سی سی ٹی ٹونٹی ورلڈ کپ کیتے ایشیا پیسیفک ریجنل فائنل توں متحدہ عرب امارات وی میگا ایونٹ کیتے کوالیفائی کر ڳھدا، ایں طرح ٹی ٹونٹی ورلڈ کپ دی ساری 20 ٹیماں دی لائن اَپ مکمل تھی ڳئی اے۔ میزبان بھارت اتے سری لنکا دے علاوہ پاکستان، متحدہ عرب امارات، آسٹریلیا، بنگلہ دیش، انگلینڈ، جنوبی افریقہ، ویسٹ انڈیز، نیوزی لینڈ، افغانستان، نمیبیا، زمبابوے، آئرلینڈ، کینیڈا، اٹلی، نیدرلینڈز، نیپال، عمان اتے امریکا دی ٹیماں میگا ایونٹ اچ مقابلہ کریسن۔ متحدہ عرب امارات (یو اے ای) جاپان دے خلاف 8 وکٹاں توں جت حاصل کر تے ٹی 20 ورلڈ کپ 2026 کیتے کوالیفائی کرݨ آلی چھیکڑی (20ویں) ٹیم ہووݨ دا اعزاز حاصل کر ڳھدا۔ 2026 دا ٹورنامنٹ وی گزریل ایڈیشن (امریکا، ویسٹ انڈیز) دی طرح تھیسی، 20 ٹیماں کوں 4 گروپاں اچ ون٘ڈیا ویسی، ہر گروپ اچ 5 ٹیماں شامل ہوسن۔ ہر گروپ توں 2 ٹیماں اڳلے مرحلے (سپر ایٹ) کیتے کوالیفائی کریسن، جئیں دے بعد ول سیمی فائنل اتے فائنل کھیݙیا ویسی۔