پاکستان اتے جنوبی افریقہ دی کرکٹ ٹیماں وچال ݙوجھا اتے چھیکڑی ٹیسٹ میچ (کل) شروع تھیسی

راولپنڈی۔19اکتوبر (اے پی پی) آئی سی سی ورلڈ ٹیسٹ چیمپئن شپ دے سلسلے اچ پاکستان اتے جنوبی افریقہ دی کرکٹ ٹیماں وچال ݙو ٹیسٹ میچاں تے دی سیریز دا ݙوجھا اتے چھیکڑی ٹیسٹ میچ (کل) سنوار کوں راولپنڈی کرکٹ سٹیڈیم اچ شروع تھیسی۔ شائقین دا جنرل، فرسٹ کلاس، پریمیئم اتے وی آئی پی انکلوژرز اچ داخلہ مفت ہوسی۔ پاکستان کوں سیریز اچ 0-1 دی برتری حاصل اے۔ قذافی سٹیڈیم لاہور اچ کھیݙے ڳئے پہلے ٹیسٹ میچ اچ پاکستان جنوبی افریقہ کوں 93 رناں نال شکست ݙتی ہئی۔ قومی ٹیم شان مسعود دی قیادت اچ میدان اچ لہسی اتے کھݙاری سیریز اچ کلین سویپ دے عزم نال پُرجوش ݙسدے پئن۔ پہلے ٹیسٹ اچ شاندار کارکردگی پاروں پاکستان ٹیم دا مورال اُچا اے۔ ݙوجھے پاسے جنوبی افریقہ دے کپتان ایڈن مارکرم راولپنڈی ٹیسٹ جیت تے سیریز برابر کرݨ کیتے پرعزم ہن۔ میچ دا آغاز سویل 10 وجے تھیسی۔ پاکستان کرکٹ بورڈ (پی سی بی) دے مطابق راولپنڈی ٹیسٹ کیتے جنرل، فرسٹ کلاس، پریمیئم اتے وی آئی پی انکلوژرز اچ داخلہ بالکل مفت ہوسی تاںجو زیادہ توں زیادہ شائقین کوں سٹیڈیم اچ آ تے آپݨی ٹیم دی حوصلہ افزائی کرݨ دا موقع مِل سڳے۔ شائقین کرکٹ کوں ہک سنسنی خیز اتے دلچسپ مقابلے دی امید اے جِتھ ݙوہیں ٹیماں آپݨی بہترین کارکردگی دے ذریعے آئی سی سی ورلڈ ٹیسٹ چیمپئن شپ اچ آپݨی پوزیشن مستحکم کرݨ دی کوشش کریسن۔