وزیراعلیٰ خیبرپختونخوا دا بلٹ پروف گاݙیاں واپس کرݨ غیر ذمہ دارانہ اتے نامناسب اقدام اے، طلال چوہدری

اسلام آباد۔20اکتوبر(اے پی پی)وزیر مملکت داخلہ طلال چوہدری آکھیے جو وزیراعلیٰ کے پی کے دی طرفوں وفاقی حکومت ولوں خیبر پختونخوا پولیس کوں دہشت گردی دی جنگ لَڑݨ کیتے ݙتی ڳئی بلٹ پروف گاݙیاں واپس کرݨ غیر ذمہ دارانہ اتے نامناسب اقدام اے، وفاقی حکومت ایں توں پہلے 600 ارب روپے توں ودھ رقم دہشت گردی دی جنگ کیتے خیبر پختونخوا کوں ݙے چکی اے، اے رقم دہشت گردی دے خلاف جنگ کیتے جواناں تے خرچ تھیوݨی ہئی، ایں نال سی ٹی ڈی ڈیپارٹمنٹ، فرانزیک لیب اتے سیف سٹیز بݨݨے ہن، چھی سو ارب روپے دا سُراغ اڄ تئیں نی مِل سڳیا جو اے رقم کتھاں ڳئی۔ وزیراعلیٰ خیبر پختونخوا دے بیان تے ردعمل اچ وزیر مملکت داخلہ طلال چوہدری آکھیا جو وفاقی حکومت جیڑھیاں گاݙیاں ݙتیاں ایں بارے آکھیا ڳیا جو او معیار تے نی لہندیاں، گاݙیاں عالمی معیار دیاں بلٹ پروف گاݙیاں ہن جو دہشت گردی دی جنگ اتے خطرناک جھئیں اچ استعمال کیتے ضروری ہن، اے گاݙیاں وفاقی وزراء، پاکستان دے اہم ترین اداریں دے افسراں اتے خطرناک جھئیں سودھے دہشت گردی دے آپریشنز اچ پہلے ہی استعمال تھیندیاں پئن، الحمدللہ جِتھاں اے ڳاݙی استعمال تھیندی پئی اے اُتھاں ضیان نہ تھیوݨ دے برابر ہن۔ انہاں آکھیا جے وفاقی حکومت کُجھ ݙیندی پئی اے تاں او وی ونڄایا ویندا پئے، کے پی دے بہادر پولیس افسراں اتے جواناں کوں نہتے دہشت گرداں دے اڳوں سٹیا ویندا پئے، انہاں دے پچھوں نہ سیاسی قیادت کھڑی اے اتے نہ انہاں کیتے کوئی سہولتاں ہن، ٹریننگ ہووے یا ہتھیار انہاں کیتے کوئی شئے دستیاب کائنی۔ وزیرمملکت داخلہ آکھیا جو ساریں توں ودھ دہشت گردی دا سامݨا کے پی دی بہادر پولیس کوں اے جو فرنٹ فٹ تے لَڑدی پئی اے، روزانہ دی بنیاد تے جوان اتے افسر شہید تھیندے پئن، انہاں کوں محفوظ کرݨ اتے دہشت گردی دی جنگ کوں تکھا کرݨ کیتے اے گاݙیاں ݙتیاں ڳئن۔ طلال چوہدری آکھیا جو اڄ خیبر پختونخوا اچ ہک نابالغ وزیراعلیٰ کوں لا ݙتے جیڑھا وزیراعلیٰ تاں پَرے دی ڳالھ کہیں وزارت کیتے وی پُختہ کائنی۔ انہاں آکھیا جو وزیراعلیٰ خیبر پختونخوا دا فیصلہ نابالغ اتے ٻالاں آلی سوچ کوں ظاہر کریندے ، وفاقی حکومت اتے وزارت داخلہ خیبر پختونخوا پولیس کوں ہرممکن وسائل ݙیوݨ چاہندی اے، وفاقی حکومت خیبر پختونخوا پولیس ہووے یا کوئی ٻیا ادارہ، دہشت گردی دا قلع قمع کرݨ کیتے ہر ممکن وسائل ݙیسی۔