پاکستان اتے چین وچال پراݨی اتے مضبوط شراکت داری جاری، قومی ایئرلائن دی نجکاری سال دے چھیکڑ توں پہلے مکمل تھیوݨ دی امید اے، وزیر خزانہ محمد اورنگزیب دا سی جی ٹی این کوں انٹرویو

واشنگٹن ۔22اکتوبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو پاکستان اتے چین وچال دیرینہ اتے مضبوط شراکت داری جاری اے، قومی ایئرلائن دی نجکاری سال دے چھیکڑ توں پہلے مکمل تھیوݨ دی امید اے، جاری مالی سال اچ شرح نمو تقریباً 3.5 فیصد رہݨ دی امید اے، امریکا دے نال ٹیرف مذاکرات کامیابی نال مکمل تھیوݨ نال پاکستانی ٹیکسٹائل خاص کر ہوم ٹیکسٹائل دے برآمد کنندگاں کوں نمایاں فائدہ تھیسی۔ اے ڳالھیں انہاں بین الاقوامی مالیاتی فنڈ (آئی ایم ایف) اتے عالمی بینک دے سالانہ اجلاساں دے موقع تے واشنگٹن ڈی سی اچ سی جی ٹی این امریکا کوں انٹرویو ݙیندیں ہوئیں کیتی۔ وزیر خزانہ ملک دی معاشی صورتحال، اصلاحات دے پروگرام اتے مستقبل دے اقتصادی لائحۂ عمل بارے تفصیلی ڳالھ مہاڑ کیتی۔ انہاں ݙسایا جو گزریل ہک سال اچ پاکستان معاشی استحکام دے حوالے نال نمایاں پیش رفت کیتی، مالی اتے بیرونی کھاتیاں اچ بہتری آئی، روپے دی قدر مستحکم رہی، زرمبادلہ دے ذخائر اݙھائی مہینے دی درآمدات دے برابر تھی ڳئن اتے مہنگائی دی شرح ہک ہندسے اچ تھی گئی اے۔ انہاں دا آکھݨ ہا جو پالیسی ریٹ اچ نمایاں کمی کیتی گئی اے جݙاں جو ہک بین الاقوامی ریٹنگ ایجنسیاں فِچ، ایس اینڈ پی اتے موڈیز تقریباً ݙو سالاں دے وقفے دے بعد پاکستان دی معاشی درجہ بندی اچ بہتری ݙیکھائی۔ وزیر خزانہ آکھیا جو آئی ایم ایف دے توسیعی مالیاتی پروگرام دے تحت ݙوجھی جائزہ رپورٹ مکمل تھی گئی اے جئیں دے بعد سٹاف سطح معاہدہ طے تھیے۔ انہاں دا آکھݨ ہا جو آئی ایم ایف پاکستانی حکومت دے جاری اصلاحاتی اقدامات تے اعتماد دا اظہار کیتا جِتھ ٹیکس نظام، توانائی دے شعبے، سرکاری اداریاں دی نجکاری اتے مالی نظم و ضبط متعلق اصلاحات شامل ہن۔ وزیرِ خزانہ نے نجکاری پروگرام دی بحالی دا ذکر کریندیں ہوئیں آکھیا جو ایں مالی سال اچ پہلی ٹرانزیکشن مکمل تھی گئی جئیں دے تحت ہک نجی بینک کوں متحدہ عرب امارات دی کمپنی ڳھن ڳھدے، قومی ایئرلائن دی نجکاری وی سال دے چھیکڑ توں پہلے مکمل تھیوݨ دی امید اے۔ سینیٹر محمد اورنگزیب آکھیا جو چنڳی معاشی بنیاد دے باعث پاکستان ݙو سال توں ودھ وقفے دے بعد ٻئے بین الاقوامی مالیاتی منڈیاں تئیں رسائی حاصل کرݨ اچ کامیاب تھیا۔ حکومت مشرقِ وسطیٰ دے بینکاں توں قرض حاصل کیتا اتے سال دے اختتام توں پہلے پہلا پانڈا بانڈ جاری کرݨ دی تیاری مکمل کریندی پئی اے۔ انہاں دا آکھݨ ہا جو پاکستان ستمبر اچ 50 کروڑ ڈالر دے یورو بانڈ دی ادائیگی ویلھے تے کیتی اتے آئندہ اپریل اچ 1.3 ارب ڈالر دی ادائیگی کیتے وی پرعزم اے۔ وزیرِ خزانہ ݙسایا جو حکومت ڈیجیٹل معیشت دے فروغ تے خصوصی توجہ ݙیندی پئی اے، شنگھائی تعاون تنظیم دے اڄوکے اجلاس اتے صدر شی جن پنگ دے عالمی حکمرانی دے اقدام دا حوالہ ݙیندیں ہوئیں وزیرِ خزانہ آکھیا جو پاکستان خودمختاری، قانون دی بالادستی اتے کثیرالجہتی تعاون دے اصولاں دی پوری حمایت کریندے جیہڑا پاکستان دی خارجہ تے معاشی پالیسی دا بنیادی حصہ اے۔ وزیرِ خزانہ آکھیا جو پاکستان معاشی استحکام، ڈھانچہ جاتی اصلاحات اتے پائیدار تے جامع نمو دے رستے تے ڳامزن اے اتے حکومت سرمایہ کاری دے فروغ، مالی نظم و ضبط اتے مدتی ترقی کیتے پرعزم اے۔