پاکستان کرکٹ بورڈ ولوں آوݨ آلی وائٹ بال سیریز کیتے قومی سکواڈز دا اعلان

لاہور۔23اکتوبر (اے پی پی) پاکستان کرکٹ بورڈ (پی سی بی) جنوبی افریقا، سری لنکا اتے زمبابوے دے خلاف آوݨ آلی وائٹ بال سیریز کیتے قومی سکواڈز دا اعلان کر ݙتے، جئیں دے مطابق ٹی ٹونٹی انٹرنیشنل سیریز کیتے 15 رکنی جݙاں جو ون ڈے انٹرنیشنل سیریز کیتے 16 رکنی ٹیماں دا اعلان کیتا ڳئے۔ پاکستان اتے جنوبی افریقا وچال ٹی ٹونٹی سیریز 28 اکتوبر توں ہِک نومبر تئیں کھیڈی ویسی، جݙاں جو ون ڈے سیریز فیصل آباد اچ 4 توں 8 نومبر تئیں جاری رہسی۔ پاکستان اتے سری لنکا وچال ون ڈے سیریز 11 توں 15 نومبر تئیں راولپنڈی اچ تھیسی جݙاں جو سری لنکا اتے زمبابوے دے نال ترائے ملکی ٹی ٹونٹی سیریز 17 توں 29 نومبر تئیں راولپنڈی اتے لاہور اچ کھیڈی ویسی۔ پی سی بی دے مطابق عثمان طارق پہلی واری ٹی ٹونٹی سکواڈ اچ شامل کیتے ڳئن جݙاں جو عبدالصمد، بابراعظم اتے نسیم شاہ دی ٹی ٹونٹی ٹیم اچ واپسی تھئی اے۔ ایں طرح فیصل اکرم، حارث رئوف اتے حسیب اللہ کوں ون ڈے سکواڈ اچ ٻئیا موقع ݙتا ڳئے۔ ٹی ٹونٹی انٹرنیشنل ٹیم دی قیادت سلمان علی آغا کریسن جݙاں جو شاہین شاہ آفریدی ون ڈے سکواڈ دے کپتان ہوسن۔ ٹی ٹونٹی سکواڈ اچ سلمان علی آغا کپتان، عبدالصمد، ابرار احمد، بابر اعظم، فہیم اشرف، حسن نواز، محمد نواز، محمد وسیم جونیئر، محمد سلمان مرزا، نسیم شاہ، صاحبزادہ فرحان وکٹ کیپر، صائم ایوب، شاہین شاہ آفریدی، عثمان خان وکٹ کیپر، عثمان طارق شامل ہن جݙاں جو ریزرو کھڈاریاں اچ فخر زمان، حارث رئوف، سفیان مقیم شامل ہن ایں طرح ون ڈے سکواڈ اچ شاہین شاہ آفریدی کپتان، ابرار احمد، بابر اعظم، فہیم اشرف، فیصل اکرم، فخر زمان، حارث رئوف، حسیب اللہ، حسن نواز، حسین طلعت، محمد نواز، محمد رضوان وکٹ کیپر، محمد وسیم جونیئر، نسیم شاہ، صائم ایوب، سلمان علی آغا شامل ہن۔