پاکستان اتے جنوبی افریقہ دی کرکٹ ٹیماں وچال ٹی 20 سیریز (منگل) کوں راولپنڈی کرکٹ سٹیڈیم اچ شروع تھیسی

راولپنڈی۔27اکتوبر (اے پی پی) پاکستان اتے جنوبی افریقہ دی کرکٹ ٹیماں وچال ترائے ٹی 20 انٹرنیشنل میچاں دی سیریز (کل) منگل کوں راولپنڈی کرکٹ سٹیڈیم اچ شروع تھیسی۔ سیریز دا پہلا میچ مقامی ویلھے دے مطابق رات 8 بجے شروع تھیسی۔ ݙوہیں ٹیماں ایں اہم مقابلے کیتے بھرپور تیاری مکمل کر ݙتی اے اتے شائقین کرکٹ کوں ہک سنسنی خیز میچ ݙیکھݨ دی توقع اے۔ پاکستان ٹیم دی قیادت آل راؤنڈر سلمان علی آغا کریسن۔ سکواڈ اچ شامل ٻئے کھیڈاریاں اچ بابر اعظم، عبدالصمد، شاہین شاہ آفریدی، نسیم شاہ، صائم ایوب، عثمان خان، محمد نواز، محمد وسیم، فہیم اشرف، حسن نواز، صاحبزادہ فرحان، سلمان مرزا، ابرار احمد، عثمان خان اتے عثمان طارق شامل ہن اے۔ مایہ ناز بیٹر بابر اعظم دی ٹی 20 سکواڈ اچ واپسی تھئی اے۔ پاکستان وائٹ بال ٹیم دے ہیڈ کوچ مائیک ہیسن دا آکھݨ جو بابر اعظم ہک تجربہ کار بیٹر ہن جیہڑا ٹیم کیتے اہم کردار ادا کریسن اے۔ بابر اعظم ایں ویلھے ہک اہم سنگ میل دے نیڑے ہن اے۔ انہاں کوں بھارت دے روہیت شرما دا ٹی 20 انٹرنیشنل کرکٹ اچ سبھ توں ودھ رنز بݨاوݨ دا ریکارڈ ٻھنݨ کیتے صرف 9 رنز چاہیدن۔ روہیت شرما  159 میچاں اچ 4,231 رنز بݨائن جݙاںجو بابراعظم 128 میچاں اچ 4,223 رنز دے نال ݙوجھے نمبر تے ہن ۔ ٻئے پاسے جنوبی افریقہ دی قیادت ڈونوون فریرا کریسی اے۔ سکواڈ اچ اوٹنیل بارٹمین، کوربن بوش، میتھیو بریٹزکے، ڈیوالڈ بریوس، نانڈرے برگر، کوئنٹن ڈی کوک، ٹونی ڈے زورزی، ریزا ہینڈرکس، جارج لنڈے، لنگی نگیدی، انکابایومزی پیٹر، لوان ڈرے پریٹوریئس، اینڈائل سیمیلانے اتے لیزاد ولیمز شامل ہن اے۔