فلسطینی عوام دے ڈُکھ گھٹاوݨ اچ سعودی عرب دا بنیادی کردار اے، فلسطینی وزیرِ اعظم

ریاض ۔ 28 اکتوبر (اے پی پی) فلسطینی وزیر اعظم ڈاکٹر محمد مصطفى ایں گالھ دی تصدیق کیتی جو مملکتِ سعودی عرب، خاص طور تے شاہ سلمان مرکز برائے امداد و انسانی خدمات، فلسطینی عوام، خاص کر غزہ دے متاثرہ علاقے اچ عوامی مشکلاں گھٹاوݨ اچ ہک بنیادی اَتے فیصلہ کن کردار ادا کیتے۔ العربیہ دے مطابق انہاں آکھیا جو اے مرکز دنیا بھر دے ضرورتمنداں دی خدمت دا ہک مثال پیش کریندا پئے، خاص طور تے فلسطین اچ ایں دی سرگرمیاں دے نمایاں اثرات تھئن۔ واضح ہووے جو گزریل سال 7 اکتوبر کوں شروع تھیوݨ آلی جنگ توں بعد توں سعودی عرب فلسطین دی لگاتار امداد کیتی اے۔ شاہ سلمان مرکز، وزارتِ دفاع اَتے قاہرہ اچ سعودی سفارت خانے دے تعاون نال تقریباً 70 امدادی طیارے غزہ بھیجے گئے جنہاں اچ کھاوݨ پیوݨ دا سامان اَتے رہائشی امدادی پیکج شامل ہن تانجو غزہ دے لوکاں دی اوکھی زندگیاں کوں سہارا ݙتا ون٘ڄے۔ ایں سلسلے اچ شاہ سلمان بن عبدالعزیز دے حکم تے غزہ دے لوکاں کیتے عوامی امدادی مہم شروع کیتی گئی۔ ہݨ تئیں 23 لکھ توں ودھ شہریاں حصہ گھِدا اَتے مجموعی عطیات 73.2 کروڑ سعودی ریال (تقریباً 19.5 کروڑ امریکی ڈالر) تئیں پُڄ ڳئن۔ مہم دے شروع تھیندے ای فرماں روا شاہ سلمان بن عبدالعزیز اَتے ولی عہد شہزادہ محمد بن سلمان 5 کروڑ ریال دا عطیہ ݙے تے فلسطینی عوام دے نال مملکت دے بنیادی اَتے پُراݨے عزم دا اعادہ کیتا۔