نامور مصنف اَتے کالم نگار اَشفاق لغاری دی کتاب “نفرت کی دریافت” دی افتتاحی تقریب

اسلام آباد (اے پی پی) نامور مصنف اَتے کالم نگار اشفاق لغاری دی کتاب “نفرت کی دریافت” دی افتتاحی تقریب اسلام آباد اچ تھئی۔ بلیک ہول اچ تھیوݨ آلی ایں تقریب اچ مشہور صحافیاں، وکیلاں، ادیباں، محققاں اَتے سماجی کارکناں دی وݙی تعداد شرکت کیتی۔ تقریب نال خطاب کریندے ہوئیں مصنف اَتے شاعر حسن مجتبیٰ، مشہور صحافی مطیع اللہ جان، محقق اَتے تجزیہ نگار ڈاکٹر خادم حسین، امن اَتے نوجواناں دی تربیت کیتے کم کرݨ آلے سید علی حمید اَتے خواجہ سرا برادری دے حقوق کیتے سرگرم ریم شریف آکھیا جو اے پاکستان دی پہلی اِیہو ڄھیں ادبی کوشش اے جیندے اچ کہیں سائبر کرائم توں متاثرہ شخص آپݨے تجربات، تکلیفاں اَتے مشاہدات کوں کتابی شکل اچ پیش کیتے۔ مصنف اَتے شاعر حسن مجتبیٰ آکھیا جو اشفاق لغاری آپݨی کتاب دا ناں ”نفرت کی دریافت“ رکھیے، کیوں جو نفرت بدبو اے، نفرت کندھ اے اَتے اشفاق اے کندھ ڈھا ݙتی اے۔ حسن مجتبیٰ آکھیا جو اشفاق لغاری پاکستان دے پہلے مصنف اَتے سائبر کرائم دے متاثرہ ہین جنہاں آپݨی کہانی کوں کتابی شکل اچ پیش کیتا اے۔ ڈاکٹر خادم حسین آکھیا جو کتاب دا انداز قرت العین حیدر اَتے سعادت حسن منٹو دی یاد تازہ کریندے، جݙاں جو مطیع اللہ جان آکھیا جو ساکوں اُنہاں لوکاں دِیاں کہانیاں وی سݨݨیاں چاہیدن جیڑھے سائبر کرائم دے حقیقی متاثرین ہن۔ سید علی حمید آکھیا جو اشفاق لغاری حوصلے اَتے حساسیت دی مثال قائم کیتی اے، کیوں جو اساݙے معاشرے اچ مرد دے ݙکھ اَتے اُنہاں دے رووݨ کوں کمزوری سمجھیا ویندے، حالانکہ مرد وی درد محسوس کریندے، روندے اَتے آپݨی کہانی سݨاوݨ دا حق رکھدے۔ خواجہ سرا برادری دے حقوق کیتے سرگرم ریم شریف آکھیا جو میکوں جانݨ اچ دلچسپی اے جو کتاب دے مرکزی کردار آصف دا انجام کیا تھیندے؟ اے اُو کتاب اے ڄیکوں جو وی ہتھ اچ گھنسی، پورا پڑھیے بغیر نا رکھ سڳسی۔ تقریب اچ مشہور ادیب نصیر میمن، سینئر صحافی قربان بلوچ، حسین جروار، وکلاء، طالب علم، صحافی اَتے مہرگڑھ اسلام آباد سودھا مختلف اداریاں دے نمائندے وی موجود ہن۔