افغانستان اچ 6.3 شدت دا زلزلہ، اموات 20 تھی گئیاں، 320 زخمی

کابل۔ 3 نومبر (اے پی پی) شمالی افغانستان اچ 6.3 شدت دے زلزلے دے نتیجے اچ گھٹ توں گھٹ 20 بندے فوت اتے 320 توں ودھ زخمی تھی گئے۔ افغان میڈیا موجب زلزلہ اتوار اتے سنوار دی وچلی رات تقریباً 1 وجے آیا اتے ایندا مرکز صوبہ بلخ دے ضلع خُلم اچ ہا جیڑھا جو کابل، بغلان، سمنگان، سَرِ پل اتے قندوز اچ وی زلزلے دے جھٹکے محسوس تھیے ۔ مقامی ذرائع موجب سب توں ودھ جانی و مالی نقصان سمنگان اتے بلخ صوبیاں اچ تھیے جتھ امدادی ٹیماں متاثرہ علاقیاں اچ بھیج ݙتیاں ڳئن۔ وزارت صحت عامہ دے ترجمان ڈاکٹر شرفات زمان ݙسایا جو ابتدائی خبراں موجب سمنگان صوبے اچ 20 توں ودھ اموات اتے 320 زخمی رپورٹ تھین جِنہاں کوں نیڑے دے ہسپتالاں اچ منتقل کر ݙتا گئے ۔ انہاں دا آکھݨ ہا جو ریسکیو کارروائیاں جاری ہن اتے خدشہ اے جو ہلاکتاں دی گݨتی ودھ سگدی اے۔ طبی ٹیماں متاثرہ علاقیاں اچ پڄ ڳئن ڄڈانجو وزارت سارے نیڑے دے ہسپتالاں کوں ہائی الرٹ رہݨ دی ہدایت جاری کیتی ہوئی اے۔ ݙوجھے پاسے بلخ ریجنل ہسپتال دے ترجمان کمال خان زدران ݙسایا جو ترائے لاشاں اتے 110 زخمی بندیاں کوں ابو علی سینا بلخی ہسپتال مزار شریف منتقل کر ݙتا گئے ۔ وزارتِ دفاع موجب 209ویں الفتح آرمی کور ولوں امدادی ٹیماں اتے ایمرجنسی یونٹس متاثرہ علاقیاں اچ پڄ ڳئن اتے ریسکیو، انخلا اتے متاثرہ گھراں دی مدد دا عمل جاری اے۔