پائیدار بڑھوتری کیتے ڈھانچہ جاتی اصلاحات ضرور ہن، وزیراعظم اصلاحات دے عمل کوں اڳوں تے ودھاوݨ اچ قائدانہ کردار ادا کریندے پئن، وزیر خزانہ محمد اورنگزیب دی حکومت دی معاشی ٹیم نال پریس بریفنگ

اسلام آباد۔ 3 نومبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا اے جو پائیدار بڑھوتری کیتے اُتار چڑھاؤ دے چکر کوں مُکاوݨ اتے معاشی استحکام و سازگار جیو پولیٹیکل حالات کوں ودھ توں ودھ سرمایہ کاری اتے تجارت کیتے استعمال وچ گھنݨ اساݙا مقصد اے، ڈھانچہ جاتی اصلاحات تے عمل درآمد جاری اے، پائیدار بڑھوتری کیتے ڈھانچہ جاتی اصلاحات لازم ہن، وزیراعظم اصلاحات دے عمل کوں اڳوں تے ودھاوݨ اچ قائدانہ کردار ادا کریندے پئن۔ سنوار کوں اتھاں حکومت دی معاشی ٹیم دے ارکان دے نال پریس کانفرنس کریندیں ہوئیں وزیر خزانہ آکھیا جو معاشی استحکام حاصل کرݨ دے بعد پائیدار بڑھوتری اساݙا ہدف اے، کلی معیشت دی صورتحال مستحکم اے اتے 3 بین الاقوامی کریڈٹ ریٹنگ ایجنسیاں ولوں پاکستان دی کریڈٹ ریٹنگ اچ بہتری اتے آئی ایم ایف دے سٹاف لیول معاہدے نال پاکستان دی معاشی سمت دے درست ہووݨ تے بیرونی اعتماد ظاہر تھیندا پئے۔ وزیر خزانہ آکھیا جو ٹیکس، توانائی، سرکاری اداریاں اچ اصلاحات، رائٹ سائزنگ اتے نجکاری دے شعبے اچ بڑھوتری جاری اے، وزیراعظم اصلاحات دے عمل کوں اڳوں تے ودھاوݨ اچ قائدانہ کردار ادا کریندے پئن۔ ہک سوال دے جواب اچ انہاں آکھیا جو برآمدات اچ 8.2 فیصد اضافہ تھیے، تجارتی خسارہ 9 فیصد ودھیا اے لیکن ترسیلات زر (remittances) اچ اضافے ایندے اثرات کوں گھٹ کرݨ اچ مدد ݙتی اے۔ کرنٹ اکاؤنٹ خسارہ وی کنٹرول اچ اے، ایں مہینے قومی مالیاتی کمیشن دا افتتاحی اجلاس تھیوݨ دا امکان اے۔ انہاں آکھیا جو ڈھانچہ جاتی اصلاحات کوں منطقی انداز اچ مکمل کرݨ ضروری اے، مہانگائی سنگل ڈیجٹ اچ اے، کابینہ ولوں ای سی سی کوں ہدایات ملیاں ہن اتے ایندے مطابق مہانگائی تے قابو پاوݨ کیتے اقدامات دی نگرانی کیتی ویندی پئی اے۔ چیئرمین ایف بی آر راشد محمود لنگڑیال آکھیا جو ہک سال اچ جی ڈی پی دے تناسب نال ٹیکساں دی شرح اچ 1.49 فیصد اضافہ تھیے، ایں طرح دی نمایاں ترقی ہک سال اچ پورے خطے دے کہیں ملک اچ نئی تھئی اتے ایں ڳالھ کوں عالمی بینک وی منیندے۔ انہاں آکھیا جو فائلرز دی گنتی 50 لکھ توں ودھ تے 59 لکھ تھی ڳئی اے، ریٹرن دے نال ٹیکساں دی وصولی 60.2 ارب توں ودھ تے 69 ارب تھی ڳئی اے۔