ظہران ممدانی نیویارک دا پہلا مسلمان میئر مُنتخب تھی تے تاریخ رقم کر ݙتی

نیویارک۔ 5 نومبر (اے پی پی) ظہران ممدانی امریکی صدر ڈونلڈ ٹرمپ اتے ٻہوں بااثر شخصیت ایلون مسک دی کھلے عام مخالفت دے باوجود نیویارک دا پہلا مسلمان میئر مُنتخب تھی تے تاریخ رقم کر ݙتی۔ العربیہ دے مطابق 34 سالہ ظہران ممدانی دا مقابلہ نیویارک دے سابق گورنر اتے آزاد امیدوار اینڈریو کومو اتے امریکی حکمران جماعت ریپبلکن پارٹی دے امیدوار کرٹس سلوا نال ہئی۔ اے الیکشن کئی حوالیں نال اہم ثابت تھیا کیوںجو 2001 دے بعد پہلی واری نیویارک دے میئر دے انتخابات اچ ساریں توں ودھ ووٹرز حصہ ڳھدا۔ تقریباً 20 لکھ توں ودھ شہریاں پولنگ اسٹیشناں تے ونڄ تے آپݨا حقِ رائے دہی استعمال کیتا۔ 1991 اچ یوگنڈا اچ جمݨ آلے ظہران ممدانی دے والدین دا تعلق بھارت نال اے۔ ظہران ممدانی دے نیویارک شہر دے میئر مُنتخب تھیوݨ دی خبر دے بعد سابق امریکی صدر باراک اوباما جتݨ آلے سارے ڈیموکریٹک امیدواراں کوں مبارکباد ݙتی۔ اوباما آپݨے ایکس اکاؤنٹ تے لِکھیا جو ظہران ممدانی دی کامیابی اساں کوں یاد ݙویندی اے جو جݙاں وی اساں کہیں مضبوط مستقبل دی پاسے ݙیکھݨ آلے رہنماواں دے چاروں پاسے کٹھا تھیندے ہیں جو لوکاں دے مسئلیں دا خیال رکھدن، تاں اساں جِت سڳدوں۔