اصلاحات دے ایجنڈے، مالی نظم و ضبط اتے اسٹریٹیجک شراکت داریاں دا مقصد ملک دی معاشی رُخ کوں نویں سرے توں طے کرݨ اے، وفاقی وزیر خزانہ تے محصولات سینیٹر محمد اورنگزیب

کراچی۔ 5 نومبر (اے پی پی) وفاقی وزیر خزانہ تے محصولات سینیٹر محمد اورنگزیب آکھیا جو اصلاحات دے ایجنڈے، مالی نظم و ضبط اتے اسٹریٹیجک شراکت داریاں دا مقصد ملک دی معاشی رُخ کوں نویں سرے توں طے کرݨ اے۔ نینگراں کوں ڈیجیٹل اتے تکنیکی مہارتاں نال آراستہ کرݨ ضروری اے۔ آبادی اچ ودھارے اتے ماحولیاتی تبدیلیاں پاکستان کیتے ݙو وݙے وجودی چیلنجز ہن جئیں نال نبڑݨ کیتے اقدامات ضروری ہن۔ اے ڳالھیں انہاں “فیوچر سمٹ” توں خطاب کریندیں ہوئیں کیتا۔ وزیر خزانہ آکھیا جو گزریل کجھ ہفتیں اچ انہاں واشنگٹن اتے ریاض اچ ملاقاتاں کیتن۔ عالمی معاشی بحالی دا عمل جاری اے اتے ایںدے نتیجے اچ کجھ معاشی اشاریاں اچ بہتری وی آندی پئی اے۔ دنیا دے کئی ملکاں اچ بنیادی ڈھانچہ جاتی اصلاحات تے عملدرآمد تھیندا پئے اتے ایںدے نتیجے اچ نجی شعبہ قائدانہ کردار کیتے اڳوں آندا پئے۔ مصنوعی ذہانت اتے ٹیکنالوجی تے مبنی نویں سوچ دے موقعیں توں بھرپور فائدہ ڳھندے ہوئیں پیداواریت تے مبنی اقتصادی ترقی اتے بڑھوتری تے توجہ ݙیوݨ دی لوڑھ اے۔ وزیر خزانہ آکھیا جو سیاسی تے جغرافیائی عوامل تے کھچاوٹ، پروٹیکشن ازم، عالمی آرڈر اچ تبدیلی اتے سپلائی چین دی رکاوٹاں دی وجہ توں بے یقینی پیدا تھیندی اے۔ پاکستان سمیت اُبھرݨ آلی معیشتاں کوں ایں سلسلے اچ محتاط طرز عمل دا مظاہرہ کرݨا پوسی تاںجو معاشی جھٹکیں دا مقابلہ کیتا ونڄ سڳے ۔ وزیر خزانہ آکھیا جو ملکی معیشت مستحکم اے۔ وݙیاں ریٹنگ ایجنسیاں ولوں پاکستان دی کریڈٹ ریٹنگ اچ بہتری اتے آئی ایم ایف پروگرام دے تحت اسٹاف لیول معاہدے نال ملکی معیشت، پالیسیاں اتے رُخ تے بیرونی اعتماد دی عکاسی تھیندی پئی اے۔ معاشی استحکام کوں پائیدار اقتصادی بڑھوتری کیتے استعمال کرݨ ضروری اے۔ ایں مقصد کیتے ملکی سطح تے اتے بین الاقوامی سرمایہ کاراں کوں راغب کرݨ اہمیت دا حامل ہوسی ۔ پاکستان اسٹاک ایکسچینج اچ کارپوریٹ شعبے دے منافع اچ کیلنڈر سال دے پہلے نو مہینیں اچ 14 فیصد ودھارا تھیے۔ وزیر خزانہ آکھیا جو پاکستان دی معیشت دے استحکام، سرمایہ کاراں دے اعتماد دی بحالی اتے پائیدار ترقی دی راہ متعین کرݨ کیتے ردِ عمل تے مبنی پالیسی سازی دی بجائے اصلاحات تے مبنی دوراندیش حکمتِ عملی اپناوݨ دی لوڑھ اے۔