پاکستان چھیویں واری ہانگ کانگ سکسز دا ٹائٹل جیت ڳھدے

ہانگ کانگ۔ 9 نومبر(اے پی پی) پاکستان کویت کوں ہرا تے چھیویں واری ہانگ کانگ سکسز دا ٹائٹل جیت ڳھدے۔ پاکستان فائنل اچ کویت کوں 43 رنز توں ہرائے۔ قومی ٹیم سب توں ودھ واری ہانگ کانگ سکسز جیتݨ آلی ٹیم ٻݨ ڳئی اے۔ چھیکڑی واری پاکستان 2011 اچ اے ٹائٹل جیتیا ہا۔ فائنل اچ کویت ٹاس جیت تے پاکستان کوں پہلے بیٹنگ کرݨ دی دعوت ݙتی، پاکستان مقررہ 6 اوورز اچ 3 وکٹاں دے نقصان تے 135 رنز ٻݨائے، کپتان عباس آفریدی 52 رنز ٻݨا تے ریٹائرڈ ہرٹ تھئین۔ عبدالصمد 42، خواجہ نافع 22 اتے شاہد عزیز بغیر کوئی رن ٻݨائے آؤٹ تھئین۔ معاذ صداقت 10 اتے محمد شہزاد 4 رنز نال ناٹ آؤٹ رہین۔ 136 رنز ٻݨاوݨ کیتے کویت دی ٹیم 92 رنز ہی ٻݨا سڳی۔ پاکستان ٹیم سیمی فائنل اچ آسٹریلیا اتے کویت سیمی فائنل اچ انگلینڈ کوں 37 رنز توں ہرا تے فائنل کیتے کوالیفائی کیتا ہا۔