دہشت گردی دنیا کیتے سنگین خطرہ، جیکوں مکاوݨ کیتے نہ صرف سکیورٹی اقدامات ٻھل پارلیمانی تعاون، مالی نگرانی اتے اجتماعی سیاسی عزم دی وی لوڑھ اے، بین الپارلیمانی سپیکرز کانفرنس دا متفقہ اعلامیہ

اسلام آباد۔ 12 نومبر(اے پی پی)بین الپارلیمانی سپیکرز کانفرنس دے متفقہ اعلامیہ اچ آکھیا ڳئے جو دہشت گردی دنیا کیتے ہک سنگین خطرہ برقرار اے اتے ایںدے خاتمے کیتے نہ صرف سکیورٹی اقدامات ٻھل پارلیمانی تعاون، مالی نگرانی اتے اجتماعی سیاسی عزم دی وی لوڑھ اے۔ ٻُدھ کوں سینیٹ سیکرٹریٹ توں جاری بیان دے مطابق ݙو ݙینہہ آلی بین الپارلیمانی سپیکرز کانفرنس مُک ڳئی جݙاں جو اسلام آباد اعلامیہ متفقہ طور تے منظور کر گھدا ڳیا۔ چیئرمین سینیٹ و بانی چیئرمین آئی ایس سی سید یوسف رضا گیلانی ولوں دہشت گردی کوں وݙا چیلنج قرار ݙِتا ڳیا۔ اعلامیہ موجب دہشت گردی دنیا کیتے وݙا اتے سنگین خطرہ اے، ایںدے خاتمے کیتے مشترکہ حکمت عملی، باہمی تعاون اتے ہم آہنگ عالمی تعاون دی لوڑھ اے۔ سید یوسف رضا گیلانی ولوں اسلام آباد اتے وانا اچ تھیوݨ آلے حملیاں دی مذمت کیتی ڳئی اَتے آکھیا ڳیا جو ”دہشت گرداں دا کوئی مذہب کائنی ہوندا، او انسانیت دے دشمن ہن“۔اعلامیہ اچ اقوام متحدہ دے چارٹر اتے بین الاقوامی قوانین دے تحت امن، سلامتی اتے جامع ترقی دے اصولاں نال پکی وابستگی دا اعادہ کیتا ڳیا۔ شرکاء یقین ظاہر کیتا جو پارلیماناں ولوں مکالمے، قانون سازی اچ جدت اتے پارلیمانی سفارت کاری دے ذریعے مسئلیاں دے حل اچ اہم کردار ادا کیتا ونڄ سڳدے۔ آئی ایس سی کوں بامعنی پارلیمانی مکالمے اتے استعداد کار ودھاوݨ دا اہم پلیٹ فارم سمجھیا ڳیا۔ ایں حقیقت کوں منیا ڳیا جو پائیدار ترقی دیر پا امن دے بغیر ممکن کائنی اتے امن انصاف، مساوات اتے جامع سماجی و اقتصادی ترقی دے بغیر حاصل نی تھی سڳدا۔ اعلامیہ اچ دہشت گردی، شدت پسندی، موسمیاتی تبدیلی، خوراک و پاݨی دی قلت، غربت اتے اسلاموفوبیا جیڑھے عالمی چیلنجاں دا مقابلہ اجتماعی تعاون اتے مکالمے دے ذریعے کرݨ دی اہمیت کوں تسلیم کیتا ڳیا۔ اعلامیہ دے آخر اچ عزم کیتا ڳیا جو پارلیماناں قائدانہ کردار ادا کریندیاں رہسن اتے ہک اینجھا نظام بݨیسن جو منصفانہ، جامع اتے سبھ کیتے خوشحالی دا باعث ہووے۔