سرائیکی دی پہلی ٹیلی فلم”روہی دی راݨی” دی ہیروئن عائشہ خان “شمو” جھوک لݙا ڳئی

اسلام آباد۔14نومبر (اے پی پی، سرائیکی نیوز سروس)  سرائیکی فلمی دنیا دی معروف اداکارہ “شمو، روہی دی را‏ݨی”  جنھاں دا اصل ناں عائشہ خان ہا سرائیکی فلم تے ڈرامہ انڈسٹری دی پہلی نشابر تریمت اداکارہ ہئی جئیں آپݨی محنت، فن تے جدوجہد نال ایں میدان اچ ہک مقام حاصل کیتا انھاں دی شہرت پہلی سرائیکی ہٹ فلم “روہی دی راݨی” توں تھئی جیندے بعد نہ صرف انھاں دی گھر گھر سنڄاݨ تھئی جڈاں انھاں دی فنی زندگی کوں ترقی نصیب تھئی ۔ شمو فلمی سفر دوران کونج، پہاج، اضلی فضلی، چاچا بھتریجا سمیت درجناں سرائیکی ٹیلی فلماں اچ بطور ہیروئن یادگار کردار ادا کیتے۔ ٹیلی فلماں دے نال نال او سرائیکی تھیٹر، ڈرامے ، اسٹیج خاکے تے ماڈلنگ دے میدان اچ انھاں کم کیتا ۔ آپدے فن دی خدمت کیتے او رحیم یارخان توں تعلق رکھدی ہن پر رہائش بہاول پور اچ کرائے دے مکان اچ رکھی ہئی ۔

پچھلے کجھ ڈینھاں اچ انھاں دی طبیعت خراب تھیوݨ تے ݙو ڈینھ توں بہاول وکٹوریہ ہسپتال اچ علاج پاروں داخل ہن جتھ خمیس دی نماشاں او جھوک لݙا گئی۔ مرحومہ چار بالاں دی ماء ہئی ترائے دھیاں تے ہک پتر کو مونجھا کر ڳئی اے۔انھاں دا جنازہ اج جمعے کوں ݙینھ دے 11 وجے تھلی چوک، رحیم یار خان اچ پڑھی گئی تے مقامی غستان اچ دفنا ݙتا گئے۔ اداکارہ عائشہ خان سادگی، جدوجہد تے کسمپرسی اچ حیاتی گزاری۔ افسوس جو آپدے آپݨے فنی مقام دے باوجود مرݨ ویلھے تنگ حالات اچ رہندی ہئی ۔ انہاں دے انتقال تے سرائیکی آرٹ، تھیٹر، فلمز تے ثقافت نال جڑی سنگت ݙکھ دی سانجھ کیتی اے۔ سرائیکی ثقافت دے فروغ اچ انھاں دا کردار ہمیشہ یاد رکھیا ویسی ، اتے انھاں دی فنی خدمات سرائیکی وسیب کیتے ہک روشن حوالہ رہسی۔

ڈاکٹر سعدیہ کمال