ٹی ٹی پی پاکستان دے خلاف بہوں سارے “ہائی پروفائل” حملے کر چکی اے، اقوام متحدہ

اقوام متحدہ۔ 20 نومبر (اے پی پی) اقوام متحدہ دی سلامتی کونسل دی کمیٹی خبردار کیتا جو افغان طالبان دی حمایت یافتہ تحریکِ طالبان پاکستان (ٹی ٹی پی) پاکستان دے خلاف بہوں سارے “ہائی پروفائل” حملے کر چکی اے، جنہاں اچ بعض اچ وݙی سطح تے جانی نقصان وی تھیے۔ اقوام متحدہ اچ ڈنمارک دی نائب مستقل مندوب اتے 1267 القاعدہ سینکشنز کمیٹی دی سربراہ ایمبسیڈر سینڈرا جنسن لانڈی سلامتی کونسل کوں رپورٹ پیش کریندیں ہوئیں آکھیا جو تقریباً 6 ہزار جنگجوواں تے مشتمل ٹی ٹی پی علاقے کیتے ہک سنگین خطرہ اے اتے ایں کوں طالبان دی عبوری حکومت ولوں لاجسٹک اتے مالی معاونت حاصل اے۔ پاکستان دے نائب مستقل مندوب اقوام متحدہ عثمان جدون ݙسیا جو پاکستان دہشت گردی دے خاتمے دے عالمی اقدامات اچ فرنٹ لائن سٹیٹ اے، اتے ایں جنگ اچ 80 ہزار توں زیادہ جاناں دی قربانی دے نال نال ارباں ڈالر دا اقتصادی نقصان برداشت کیتے۔ انہاں آکھیا جو اساݙی بہادر سکیورٹی فورسز اتے قانون نافذ کرݨ آلے ادارے افغانستان توں آوݨ آلے دہشت گردی دے خطرات دا مسلسل مقابلہ کریندے پئن جتھاں داعش خراسان، ٹی ٹی پی اتے انہاں نال جُڑے ہوئے بی ایل اے اتے ایں دی ذیلی تنظیم مجید بریگیڈ سویں گروہ آپݨے میزباناں دی سرپرستی اچ اتے اساݙے مخالف مُلک جیڑھا جو صرف خطے کوں غیر مستحکم کرݨ دا کم کریندے، دی حمایت نال کم کریندے پئن۔ پاکستانی مندوب ایں گالھ تے زور ݙتا جو 1267 القاعدہ سینکشنز کمیٹی دے پابندیاں دے نظام کوں “زمینی حقائق” دے مطابق ہووݨا چاہیدے اتے لِسٹ اچ شامل کرݨ یا کڈھݨ دے مسئلیاں کوں انصاف، شفافیت اتے سیاسی اثرات دے بغیر حل کیتا ونڄے ۔ انہاں آکھیا جو اقوام متحدہ دے انسداد دہشت گردی دے فریم ورک کوں پرتشدد اتے انتہا پسند گروہاں دے خلاف سخت اقدامات کرݨ کیتے ضروری اوزار رکھݨے چاہیدن ۔ ایں موقع تے چینی مندوب کمیٹی توں بلوچستان لبریشن آرمی اتے ایں دے مجید بریگیڈ کوں دہشت گرداں دی لِسٹ اچ شامل کرݨ دی حمایت کرݨ دی اپیل کیتی، تاںجو دہشت گردی دے خلاف زیرو ٹالرنس دا مضبوط سنیھا ݙتا ونڄ سگے ۔