سرائیکی زبان تے ادب دے وݙے لکھاری ادیب براڈ کاسٹر نصراللہ خان ناصر اگلے جہان جھوک لݙا گئین

اسلام آباد۔25نومبر(اے پی پی سرائیکی نیوز سروس)استادُالاساتذہ، شاعرِ وسیب، عہد ساز محقق، براڈکاسٹر، سوجھواݨ لکھاری تے اسلامیہ یونیورسٹی بہاول پور شعبۂ سرائیکی دے روحِ رواں بانی چیئرمین پروفیسر ڈاکٹر نصراللہ خان ناصر اگلے جہان جھوک لڈا گئن۔ انہاں دی رحلت نہ صرف سرائیکی وسیب ٻھل پورے علمی اتے تہذیبی منظرنامے کیتے ہک ݙکھی سانحہ اے۔ ڈاکٹر نصراللہ خان ناصر 3 فروری 1948ء کوں سردار گل محمد خان گورگیج بلوچ دے معزز گھر وستی چاکر خان، تحصیل لیاقت پور، ضلع رحیم یارخان اچ ڄمین۔ انہاں آپݨے علاقے اچ ابتدائی تعلیم حاصل کیتی اتے میٹرک دا امتحان گورنمنٹ ہائی سکول اللہ آباد توں پاس کیتا، پر انہاں دی علمی پیاس انہاں کوں جلدی بہاولپور دے علمی مرکزاں تئیں گھن آئی۔ ایس ای کالج بہاولپور توں ایف اے اتے بی اے امتیازی نمبریں نال کیتا۔ ایم اے اردو گورنمنٹ ایمرسن کالج ملتان دے وسیلے نال پنجاب یونیورسٹی لاہور توں کیتا۔1994ء اچ بہاؤالدین زکریا یونیورسٹی ملتان انہاں کوں پی ایچ ڈی دی سند ݙتی، اتے ایویں او سرائیکی زبان و ادب دے معتبر ترین محققین دی قطار اچ رل ڳئے۔ انہاں دے تحقیقی مقالے “سرائیکی شاعری دے ہک ہزار سال” کوں سرائیکی ادبی بورڈ ملتان “سرائیکی شاعری کا ارتقا” دے عنوان نال شائع کیتا، جیڑھا جو اڄ بی ایس سرائیکی دی نصابی کتاباں اچ اُچا مقام رکھیندے اتے سرائیکی ادب دی تاریخ دا بنیادی حوالہ سمجھیا ویندے۔ انہاں 1975ء اچ ریڈیو پاکستان بہاولپور کوں جوائن کیتا، جݙاں جو 1978ء اچ رشتہ ازدواج اچ منسلک تھی ڳئے، اتے 1986ء اچ ریڈیو پاکستان بہاولپور دے سینئر پروڈیوسر تھیوݨ دا اعزاز پاتا۔  انہاں دی آواز، انہاں دا اسلوب اتے انہاں دا شعور ریڈیو پاکستان دے سَنہری دور دا حصہ رہے۔ ڈاکٹر ناصر کوں شاعری نال بے حد محبت ہئی۔ شاعری انہاں کیتے احساس دی تپش، مشاہدے دا نور اتے دھرتی دی دھڑکن ہئی۔ انہاں دا پہلا شعری مجموعہ “اووے ہوئے” سرائیکی شاعری اچ ہک نویں تازگی گھن آیا۔ ݙوجھا مجموعہ “اجرک” انہاں دی شعری ریاضت دا مضبوط نشان اے۔ انہاں دی اردو نظماں دی کتاب “یہ کیسا دُکھ ہے” انہاں دی اُردو اچ لسانی مہارت دا ثبوت ݙتا۔ سرائیکی اتے اردو تنقید دے اہم مجموعے “نویں سوبھ”، “معنویت” اتے “تشخص” انہاں دے تحقیقی وقار دے روشن نشان ہن۔

چولستانی خانہ بدوش قبیلیں دے گیتیں دا اردو ترجمہ “صحرا کے گیت” انہاں دے جمالیاتی حس اتے فکری وسعت دی جیوندی جاڳدی علامت اے۔ انہاں دی شہرہ آفاق کتاب “سرائیکی شاعری کا ارتقا”— 687 صفیاں تے کھنڈیا ہویا ہک وݙا علمی سمندر— سرائیکی ادب دے ہک ہزار سالہ پندھ کوں ایہو جیہی علمی ترتیب اتے دِل کھچݨ آلی بصیرت نال بیان کریندی اے جو اونکوں نظرانداز کرݨ ممکن نئیں۔ اے کتاب بلا شک سرائیکی زبان تےادب اتے ایندی قدامت تے ہک تاریخی دستاویز اتے ایں حوالے نال تحقیق اچ بنیادی اساس اے۔ ڈاکٹر ناصر اپݨے وسیب دے شاعر ہن؛ وسیب دے ݙکھ، ایندا حسن، ایندی محرومی، ایندی دھرتی، ایندیاں ہوائیاں سَبھ کجھ انہاں دے کلام اچ ساہ گھندے۔ او جدید نظم دے معماراں اچ ڳݨے ویندن، پر انہاں دی غزل اتے دوہا وی اپݨے اندر حیرت دی تازگی رکھیندے۔ سرائیکی وسیب دی تاریخ تے روایتاں، تصوف تے روحانیت، شخصیتاں اتے سرائیکی ادب دے امام حضرت خواجہ غلام فریدؒ نال انہاں دی عقیدت انہاں دی شاعری اچ ہک لطیف روحانی مٹھاس بݨ تے لہندی اے۔ گزریل سال انہاں کوں صدارتی تمغۂ حسنِ کارکردگی نال نوازیا ڳیا، جیڑھا جو انہاں دے علمی قد، فکری اُچائی اتے تخلیقی عظمت دا سرکاری تے عوامی اعتراف اے۔ ڈاکٹر نصراللہ خان ناصر ہک عہد ہن— علم دا عہد، محبت دا عہد، شعر دا عہد، اتے سرائیکی وسیب دے وقار دا عہد۔ انہاں دا وݨ ہک شخصیت دا رخصت تھیوݨ نئیں؛ اے پورے ادبی منظرنامے اچ ہک خلاء دا پیدا تھیوݨ اے جیڑھا شاید کݙاہیں پُر نہ تھی سڳسی ۔ اللّٰہ تعالیٰ مرحوم کوں آپݨی جوارِ رحمت اچ اُچا مقام عطا فرماوے، اتے انہاں دے علمی جانشین بھتیجے پروفیسر عابد خان چیئرمین شعبہ سرائیکی خواجہ فرید کالج رحیم یارخان سودھے سارے پسماندگان اتے وابستگان کوں صبر عطا فرماوے۔(