پاک سعودی عرب انسداد دہشت گردی سانڳے سانجھی فوجی مشق “البتار ٹو” مُک ڳئی

راولپنڈی۔ 26 نومبر(اے پی پی)پاکستان اَتے سعودی عرب دی انسداد دہشت گردی سانڳے سانجھی فوجی مشق “البتار ٹو” مُک ڳئی۔ اے مشق 18 توں 26 نومبر تئیں تھئی اے۔ پاکستان آرمی دے سپیشل سروسز گروپ اَتے سعودی عرب دی بری فوج دیاں کامبیٹ ٹیماں ایں مشق اچ حصہ ڳھدا۔ مشق دی اختتامی تقریب 26 نومبر کوں تبوک، سعودی عرب اچ تھئی۔ سپیشل سروسز گروپ دے جنرل آفیسر کمانڈنگ پاکستان ولوں مہمان خصوصی دے طور تے اختتامی تقریب اچ شرکت کیتی جݙاں جو سعودی عرب دے سینئر عسکری حکام وی ایں موقع تے موجود ہن۔ ݙوہاں برادر ملکاں دے فوجی دستیاں پوری مشق دے دوران پیشہ ورانہ مہارت، عملی صلاحیت اَتے آپسی رابطے دے مثالی معیار دا مظاہرہ کیتا۔ “البتار ٹو” دا بنیادی نکتہ انسداد دہشت گردی آپریشنز اچ سانجھی مہارت ودھاوݨا ہئی جیںدے اچ خاص طور تے ودھ آبادی آلے علاقیاں اچ لڑائی، دیسی ساختہ بماں دے تدارک اَتے مربوط تربیت دے ذریعے جنگی طریقہ کار اَتے مشقاں اچ بہتری تے زور ݙیتا ڳیا۔ ایہہ مشق پاکستان اَتے سعودی عرب دے دیرینہ اَتے ڳھاٹے عسکری تعلقات کوں مزید مضبوط بݨاوݨ دا ذریعہ وی ثابت تھئی۔ سارے تربیتی مقاصد کامیابی نال حاصل کر ڳھدے ڳئے جیںدے نال ݙوہاں ملکاں دے خطے اچ امن، سکیورٹی اَتے سانجھی دفاعی تیاری دے عزم دی تجدید تھئی۔