ڈھانچہ جاتی اصلاحات، ڈیجیٹل تبدیلیاں، بہتر طرز حکمرانی، مالی نظم و ضبط اَتے کلی معیشت دے استحکام کیتے جاری کوششاں نال مُلکی معیشت دی رفتار مثبت انداز اچ جاری اے، وزارت خزانہ

اسلام آباد۔ 28 نومبر(اے پی پی) وفاقی وزارت خزانہ آکھیے جو جاری ڈھانچہ جاتی اصلاحات، ڈیجیٹل تبدیلیاں، بہتر طرز حکمرانی، مالی نظم و ضبط اَتے کلی معیشت دے استحکام کیتے جاری کوششاں نال مُلکی معیشت دی رفتار مثبت انداز اچ جاری اے، نومبر اچ مہنگائی دی شرح 5 توں ڳھن تے 6 فیصد تئیں رہوݨ دا امکان اے۔ اے ڳالھ وزارت خزانہ ولوں جاری ماہانہ اقتصادی اپ ڈیٹ رپورٹ اچ آکھی ڳئی اے۔ وزارت خزانہ دے مطابق پاکستان دی معاشی صورتحال مجموعی طور تے مثبت قرار ݙتی ویندی پئی اے، صنعتی سرگرمیاں اچ بہتری جاری اے اَتے معاشی اصلاحات دے نتیجے اچ استحکام آندا پئے۔ نومبر اچ مہنگائی دی شرح 5.0 توں 6.0 فیصد تئیں رہݨ دا امکان اے جیںدی بنیادی وجہ خوراک دیاں قیمتاں اَتے زرعی پیداوار تے دباؤ اے۔ رپورٹ دے مطابق، اگرچہ فصلاں دی صورتحال ملی جلی اے تاں وی مناسب زرعی مداخل دی دستیابی اَتے حکومتی تعاون پاروں توقع اے جو ربیع دے جاری موسم اچ رسد بہتر اَتے مستحکم راہسی۔ رپورٹ دے مطابق پیداواری ضرورتاں کوں پُورا کرݨ کیتے درآمدات اچ وادھے دے باوجود کرنٹ اکاؤنٹ خسارہ متوقع حداں اچ اے جیںدی وجہ برآمدات اچ مسلسل وادھا اَتے ترسیلات زر دی مضبوط آمد اے، مجموعی طور تے مُلکی معیشت دی رفتار مثبت راہوݨ دی توقع اے جیکوں جاری ڈھانچہ جاتی اصلاحات، ڈیجیٹل تبدیلیاں، بہتر طرز حکمرانی، مالی نظم و ضبط اَتے کلی معیشت دے استحکام کیتے جاری کوششاں سہارا ݙیندیاں پئن۔اقتصادی اپ ڈیٹ دے مطابق مالی سال دے پہلے 4 مہینے اچ سمندر پار پاکستانیاں دی ترسیلات زر دا حجم 12.955 ارب ڈالر ریکارڈ کیتا ڳیا جیڑھا گزریل مالی سال دی اوں ویلھے اچ 11.850 ارب ڈالر دے مقابلے اچ 9.3%  ودھ اے۔ایں مدت اچ مُلکی برآمدات دا حجم 10.6 ارب ڈالر رہیا جیڑھا گزریل مالی سال دے 10.4 ارب ڈالر دے مقابلے اچ 2% ودھ اے۔ درآمدی بِل 20.7 ارب رہیا جیڑھا گزریل مالی سال دے 18.9 ارب دے مقابلے اچ9.6% ودھ اے۔ مالی سال دے پہلے چار ماہ اچ حسابات جاریہ دے کھاتیاں دا خسارہ 733.6 ملین ریکارڈ کیتا ڳیا جیڑھا گزریل مالی سال دی اوں ویلھے دے 206 ملین ہا۔ ایں مدت اچ ملک اچ براہ راست غیر مُلکی سرمایہ کاری دا حجم 747.7 ملین ریکارڈ کیتا ڳیا جیڑھا گزریل مالی سال دے 1.010 ارب دے مقابلے اچ26% گھٹ اے۔14 نومبر 2025ء کوں زرمبادلہ دے مُلکی ذخائر دا حجم 19.7 ارب ریکارڈ کیتا ڳیا جیںدے اچ سٹیٹ بینک کولو 14.5 ارب اَتے کمرشل بینکاں کولو 5.2 ارب ڈالر ہن۔ مالی سال دی پہلی سہ ماہی اچ ایف بی آر دے محاصل دا حجم 3.834 ٹریلن روپے ریکارڈ کیتا ڳیا جیڑھا گزریل مالی سال دی اوں ویلھے دے 3.442 ٹریلن روپے دے مقابلے اچ 11.4% زیادہ اے۔ مالی سال دے پہلے چار ماہ اچ مہنگائی دی اوسط شرح 4.7% ریکارڈ کیتی ڳئی جیڑھی گزریل سال دے اوں ویلھے 8.7% ہئی۔ پہلی سہ ماہی اچ وݙیاں صنعتاں دی پیداوار اچ 4.08% وادھا ریکارڈ کیتا ڳیا۔27 نومبر 2025ء کوں پاکستان سٹاک ایکسچینج دا 100 انڈیکس 165373 پوائنٹس ہا، گزریل سال 27 نومبر کوں 99269 پوائنٹس ہا، ایں سال دی مدت اچ انڈیکس اچ 66.6% دا نمایاں وادھا تھئے۔27 نومبر کوں مارکیٹ کیپٹلائزیشن دا حجم 66.79 ارب ریکارڈ کیتا ڳیا جیڑھا گزریل سال دے 45.24 ارب دے مقابلے اچ ٻہوں زیادہ اے۔ نویں کمپنیاں دی رجسٹریشن اچ سالانہ بنیاداں تے 35.6%  دی نمو تھئی اے۔