وزیراعظم محمد شہباز شریف دا عالمی یوم یکجہتی فلسطین تے سنھیا

اسلام آباد۔ 29 نومبر(اے پی پی) وزیراعظم محمد شہباز شریف فلسطینیاں دے بنیادی حق، حق خود ارادیت اَتے ہک آزاد فلسطینی ریاست کیتے پاکستان دی حمایت دا اعادہ کریندے ہوئیں آکھیے جو غزہ سودھا فلسطینیاں دی سرزمین توں اسرائیل دے مکمل انخلاء کوں یقینی بݨاوݨا ضروری اے، فلسطینیاں دے خلاف اسرائیل دے جنگی جرائم اَتے منظم نسل کشی دا عالمی قوانین دے مطابق مواخذہ تھیوݨا چاہیدے۔ جمعہ کوں وزیراعظم آفس دے میڈیا ونگ دے مطابق عالمی یوم یکجہتی فلسطین تے سنیہے اچ وزیراعظم آکھیا جو فلسطینی عوام نال یکجہتی دے عالمی ݙینہہ تے حکومت پاکستان اَتے پاکستان دے عوام غیر متزلزل عزم و یکجہتی نال آپݨے فلسطینی بھراواں اَتے ٻھیݨیں دے نال کھڑن، ݙھاکیاں توں فلسطینی عوام المناک سانحیاں دا سامݨا کیتے جیںدے اچ حق خود ارادیت دی نفی، آپݨی سرزمین توں محرومی اَتے امن و سکون دی تباہی شامل اے۔ انہاں آکھیا جو غزہ اچ70 ہزار ٻالاں، تریمتیں اَتے مرداں کوں شہید کر ݙتا ڳئے، غزہ سفاکانہ ظلم و ستم دا سامݨا کیتے، آبادیاں اَتے خانداناں کوں صفحہ ہستی توں مِٹا ݙتا ڳیا، گھراں، ہسپتالاں، سکولاں اَتے بنیادی ضروری شہری ڈھانچے کوں ملبے اچ تبدیل کر ݙتا ڳیا، ایہو جیہے افسوسناک اَتے ناقابل بیان سانحیاں دے باوجود فلسطینی عوام مثالی، غیر متزلزل اَتے بھرپور عزم و ہمت ݙکھائی اے اَتے آپݨی سنڄاݨ اَتے مقصد کیتے حصول انصاف دی امید دا پلو نئیں چھوڑیا۔ وزیراعظم آکھیا جو ݙو ریاستی حل کیتے سَݙی ڳئی حالیہ اعلیٰ سطح کانفرنس اَتے غزہ امن منصوبے دی صورت اچ ایں مسئلے دے حل دا ہک موقع مِلیے تاں وی جنگ بندی جاری راہوݨا اَتے اسرائیل ولوں ہر طرح دے تشدد دی روک تھام اَتے انسانی امداد دی بلا تعطل فراہمی کوں یقینی بݨاوݨا ٻہوں ضروری اے، اقوام متحدہ دے فلسطینی مہاجرین کیتے امداد کیتے سرگرم ادارے کوں بغیر کہیں سیاسی مداخلت اَتے رکاوٹ دے مکمل طور تے فعال بݨاوݨا ضروری اے اَتے سب توں اہم اے ہے جو اسرائیل دے فلسطینیاں دی سرزمین بشمول غزہ توں مکمل انخلاء کوں یقینی بݨایا ونڄے کیوں جو فلسطینی عوام مکمل امن اَتے خوشحالی دے حقدار ہِن۔ وزیراعظم آکھیا جو دنیا کوں غزہ اچ ظلم و ستم دی مذمت کرݨ دے نال نال مغربی کنارے دی سنگین صورتحال تے وی توجہ ݙیوݨی چاہیدی اے جتھاں غیر قانونی بستیاں دی توسیع عالمی قوانین دی کُھلی خلاف ورزی اَتے امن و سلامتی کیتے ٻہوں وݙی رکاوٹ اے۔ انہاں آکھیا جو پاکستان مسئلہ فلسطین کیتے منصفانہ، دیر پا اَتے جامع حل دی بھرپور حمایت کریندے جو اقوام متحدہ دی سلامتی کونسل اَتے جنرل اسمبلی دیاں متعلقہ قرارداداں دے مطابق ہووے، پاکستان آپݨے بھرپور تعاون اَتے فلسطینی عوام دے جائز حقوق دی مکمل حمایت دوہریندے، پاکستان، فلسطینیاں دے بنیادی حق، حق خود ارادیت اَتے ہک آزاد، قابل عمل، متحدہ فلسطینی ریاست دی حمایت کریندے جیڑھا 1967ء توں پہلے دی سرحداں دی بنیاد تے قائم تھیوے اَتے القدس الشریف ایںدا دارالحکومت ہووے۔ وزیراعظم آکھیا جو پاکستان اڄ دے ݙینہہ بالخصوص اَتے ہمیشہ کیتے فلسطینی عوام نال اظہار یکجہتی کریندے اَتے اساں منصفانہ، جائز، آزادی، عزت و وقار اَتے امن و خوشحالی کیتے انہاں دی حق تے مبنی جدوجہد دے نال ہیسے