پی ٹی آئی دا طرز سیاست جمہوری کائںی انتشار کھنڈاوݨ اے، وفاقی وزیر احسن اقبال

لاہور۔ 29 نومبر (اے پی پی) وفاقی وزیر منصوبہ بندی، ترقی و خصوصی اقدامات احسن اقبال آکھیے جو بھارت اَتے پی ٹی آئی مُلکی سالمیت دے خلاف ہک پیج تے ہِن، پی ٹی آئی دا طرز سیاست جمہوری کائںی، انتشار کھنڈاوݨ اے، “اُڑان پاکستان” منصوبہ قومی ترقی دا مرکز و محور اے اَتے نوجوان مُلکی اثاثہ ہِن، نوجوان نسل کوں ماحول دوست ترقی اچ فعال کردار ادا کرݨا ہوسی تاں جو موسمیاتی خطرات توں بچیا ونڄ سڳے، “گرین پروڈکٹیویٹی 2.0” وژن دا مقصد پاکستانی صنعت کوں نہ صرف ماحول دوست بݨاوݨا اے بلکہ اوں کوں عالمی مارکیٹ اچ مقابلے دے قابل وی کرݨا اے، حکومت گرین منصوبیں دی تکمیل کیتے ٹھوس اقدامات کریندی پئی اے۔اے ڳالھ انہاں لمز یونیورسٹی اچ 2 ݙینھ دی “انٹرنیشنل کانفرنس آن گرین پروڈکٹیویٹی 2.0” نال خطاب اَتے میڈیا نال ڳالھ مہاڑ کریندے آکھی۔میڈیا نال ڳالھ مہاڑ اچ وفاقی وزیر آکھیا جو اے مُلک خُداداد اساݙا گھر اے، اِے مُلک کائںی تاں اساݙی سیاست وی کائنی اختلاف رائے جمہوریت دی خوبصورتی اے اَتے مُلکی سیاست ہک خاندان وانگوں ہوندی اے، جیویں ہک خاندان اَتے فیملی اچ ہر فرد دی آپݨی رائے و سوچ ہوندی اے، ایویں ساریاں سیاسی جماعتاں کوں وی اختلاف رائے دا حق حاصل ہوندے، آپت اچ اختلافات تھی ونڄن تاں مُلک دے اندر رہندے انہاں اختلاف کوں ختم کرݨا ہی جمہوریت دی خوبصورتی اے۔انہاں آکھیا جو مسلم لیگ ن اَتے پیپلز پارٹی ٻہوں سخت مارشل لاء دا سامݨا کیتا پر ݙوہیں مارشل لاء توں زیادہ جبر دا اساں بانی پی ٹی آئی دے دور اچ سامݨا کیتا، اساں کُوڑے مقدمیں اچ جیلاں اچ وی ڳئے، میڈیا تے وی پابندیاں لڳیاں، ایں سب دے باوجود ایں سیاسی جنگ کوں اساں ریاست دیاں حداں اچ رہ تے لڑیے، اڄ تئیں کہیں جماعت ٻاہرلے ملک ونڄ تے پاکستان دے خلاف پروپیگنڈا اَتے پاکستان کوں عالمی عدالتاں دے کٹہرے اچ کائنی کھڑایا۔احسن اقبال آکھیا جو پی ٹی آئی دے دور حکومت کوں پاکستان دی سیاسی تاریخ دا سیاہ ترین دور قرار ݙتا ویندے، جیں اچ نوجواناں کوں ترقی، تعلیم اَتے مہارت دے بجائے صرف گالھیں مندے دی سیاست سِکھائی ڳئی، ہک اناڑی شخص کوں مُلک تے مسلط کیتا ڳیا جیں پاکستان دی معیشت اَتے اداریں کوں شدید نقصان پُڄایا، اساں کوں وی سیاسی انتقام دا نشانہ بݨایا ڳیا، بدقسمتی نال پی ٹی آئی دی قیادت سیاسی انتقام اچ اندھے تھی تے اَتے آپݨے مخصوص مقاصد کیتے عالمی سطح تے مُلکی بدنامی دا باعث بݨدی پئی اے۔انہاں آکھیا جو بھارت اَتے پی ٹی آئی مُلکی سالمیت دے خلاف ہک پیج تے ہِن، جݙاں وی پاکستان دے عالمی برادری نال چنڳے تعلقات دی کوشش ہوندی اے تاں ایں دی تکلیف پی ٹی آئی اَتے بھارت کوں ہوندی اے، مُلک ترقی دی راہ تے ٹُردے تاں ایں دی تکلیف پی ٹی آئی اَتے بھارت کوں ہوندی اے، جے آئی ایم ایف دا پروگرام ہوندے تاں تکلیف پی ٹی آئی کوں ہوندی اے یا بھارت کوں۔انہاں آکھیا جو پاکستان دی سیاست کوں بین الاقوامی سطح تے گھن ونڄ تے بدنام کرݨا خاص طور تے پاکستان دے دشمن مُلک کوں فریق بݨاوݨا انتہائی شرمناک اے، آکھدن جو اساں وݙے محب وطن ہاسے، امریکی کانگریس اچ مُلک دشمن لابیاں دے مونڈھیں تے سوار تھی تے پاکستان دے خلاف قرارداد پاس کرواوݨی اِے کیجھی محب وطنی اے، او مظلوم فلسطینیاں دے حق اچ قرار داد کیوں کائنی پاس کرویندے، او امریکی سینیٹرز توں ڈاکٹر عافیہ صدیقی دی رہائی دی قرارداد کیوں کائنی پاس کرویندے، انہاں آکھیا جو انہاں دی سیاست مُلک دشمنی تے مبنی اے، جے کوئی ریاستی مفادات نال کھیݙسی تاں سختی نال نِبڑیا ویسی۔