مکمل اَتے درست سفری دستاویزات رکھݨ آلے کہیں وی مسافر کوں سفر توں نہ روکیا ویسی، وزیرداخلہ محسن نقوی

اسلام آباد۔ 29 نومبر(اے پی پی) وفاقی وزیر داخلہ و کنٹرول منشیات محسن نقوی آکھیے جو مکمل اَتے درست سفری دستاویزات رکھݨ آلے کہیں وی مسافر کوں سفر توں نہ روکیا ویسی جݙاں جو ٻاہرلے مُلک روزگار دے کُوڑے وعدیں دے ذریعے شہریاں کوں فریب ݙیوݨ آلے لوکاں دے خلاف سخت کارروائی کیتی ویسی۔وفاقی وزیر داخلہ اے ڳالھ اسلام آباد انٹرنیشنل ایئرپورٹ دے اچانک دورے دے موقع تے آکھی ۔ انہاں ایئرپورٹ تے ݙو گھنٹے گُزارئے اَتے امیگریشن دے عمل دا جائزہ ڳھدا اَتے ٻاہرلے مُلک ونڄݨ آلے مسافراں نال ڳالھ مہاڑ کیتی۔دورے دے دوران محسن نقوی فراڈ اچ ملوث ویزا ایجنٹاں دے خلاف فوری کریک ڈاؤن دے سخت احکامات جاری کیتے اَتے خبردار کیتے جو شہریاں کوں ٻاہرلے مُلک روزگار دے بہانے دھوکہ ݙیوݨ آلے لوکاں نال کوئی نرمی نہ ورتی ویسی۔ انہاں 7 نومبر کوں ہک مسافر ولوں امیگریشن کاؤنٹراں تے عملے دی کمی دے بارے ݙتی ڳئی شکایت دا وی سنجیدگی نال نوٹس ڳھدا اَتے ذمہ وار حکام کوں ساریاں حالتاں دا سی سی ٹی وی فوٹیج دے ذریعے جائزہ گھنݨ اَتے باقاعدہ انکوائری کرݨ دا حکم ݙتا۔وزیر داخلہ مسافراں اَتے ایئرپورٹ حکام کوں یقین ݙیوایا جو آوݨ والے ویلھے اچ ایہو جہیاں شکایتاں دا کوئی جواز نہ ہوسی۔ انہاں آکھیا جو مکمل اَتے درست سفری دستاویزات رکھݨ آلے کہیں وی مسافر کوں سفر توں نہ روکیا ویسی، تاں وی نقلی یا غیر مصدقہ دستاویزات تے سفر کرݨ آلے مُلک دی ساکھ کوں ضیان ُپڄیندن ۔ ایہو جہی صورتحال کہیں وی صورت اچ قابل قبول کائنی۔محسن نقوی آکھیا جو لالچ اچ مبتلا ایجنٹ نشوم لوکاں دے مستقبل نال کھیݙدے پئِن اَتے مُلک دی ساکھ کوں ضیان پڄیندے پئن۔ انہاں مزید آکھیا جو ٻاہرلے مُلک روزگار دے کُوڑے وعدیں دے ذریعے شہریاں کوں فریب ݙیوݨ آلے لوکاں دے خلاف سخت کارروائی کیتی ویسی۔ وزیر داخلہ ایں ڳالھ دا اعادہ کیتا جو غیر مصدقہ دستاویزات تے سفر دی اجازت نہ ݙتی ویسی اَتے حکومت انسانی اسمگلنگ اَتے دستاویزی فراڈ اچ ملوث ایجنٹ مافیا دی سرگرمیاں کوں ختم کرݨ کیتے پُرعزم اے۔