مسلم اُمہ کوں متحد تھی تے سارے عصری چیلنجز دا سامݨا کرݨا ہوسی، نائب وزیراعظم و وزیر خارجہ اسحاق ڈار

اسلام آباد۔ 29 نومبر(اے پی پی) نائب وزیراعظم و وزیرخارجہ سینیٹر محمد اسحاق ڈار مسلم اُمہ اچ اتحاد اَتے یکجہتی کوں مزید مضبوط کرݨ دی لوڑھ تے زور ݙیندے آکھیے جو دنیا ہک تبدیلی دے دور توں گُزردی پئی اے ایں کیتے مسلم اُمہ کوں متحد تھی تے سارے عصری چیلنجز دا سامݨا کرݨا ہوسی۔بین الاقوامی قرات مقابلے دے شرکاء نال خطاب کریندے انہاں غزہ، مقبوضہ کشمیر، لبنان، عراق، شام اَتے ایران و قطر تے حملیں دا حوالہ ݙیندے آکھیا جو دنیا اَتے خاص طور تے مسلم دنیا متعدد مسلیں اَتے چیلنجز توں ݙُوچار اے۔ وزیر خارجہ آکھیا جو مسلم اُمہ مشترکہ عقیدے اَتے ایمان دی بنیاد تے متحد اے اَتے علماء کرام کوں چاہیدے جو اُمہ اچ اتحاد دی تعلیم ݙیون کیوں جو اِیہا مسلم دنیا دے مسلیں دا بہترین حل اے۔انہاں شرکاء نال مخاطب تھی تے آکھیا جو متحد رہو، کیوں جو زمین تے کوئی طاقت اساں کوں ضیان کائنی پُڄا سڳدی اَتے اللہ تعالیٰ اُمہ کوں وسائل نال نوازیے۔ انہاں مزید آکھیا جو اسلامی تعلیمات کہیں وی طرح دی دہشت گردی اَتے انتہا پسندی دی اجازت نئیں ݙیندیاں اَتے ہک انسان کوں قتل کرݨا پُوری انسانیت کوں قتل کرݨ دے برابر اے، جݙاں جو ہک انسان دی جان بچاوݨا پُوری انسانیت کوں بچاوݨ دے برابر اے۔ انہاں آکھیا جو موجودہ حکومت اَتے فیلڈ مارشل جنرل سید عاصم منیر دہشت گردی مکاوݨ کیتے پُرعزم ہِن۔وزیر خارجہ مُختلف ملکاں توں آئے شرکاء دا خیرمقدم کریندے آکھیا جو اِے بین الاقوامی تقریب سالانہ بنیاداں تے منعقد کیتی ویسی۔ انہاں نوجوان شرکاء کوں نصیحت کیتی جو او قرآن و سنت دیاں تعلیمات توں رہنمائی حاصل کرن اَتے ہمدردی، محبت، انسانیت، برداشت اَتے بین المذاہب ہم آہنگی جیہے اخلاقی اوصاف پیدا کرن تاں جو مسلم اُمہ مضبوط تھیوے اَتے مُلک ترقی و خوشحالی دی راہ تے ٹرے۔انہاں آکھیا جو پاکستان دا آئین اسلامی تعلیمات دے اصولاں تے مبنی اے۔ اِے بین الاقوامی مقابلہ وزارت مذہبی امور دے زیر اہتمام منعقد تھیا جیں اچ تنظیم تعاون اسلامی دے 40 توں ودھ رُکن ملکاں دے قاری شریک تھئے۔