اے آئی دے ذریعے دنیا اچ خیالات، صلاحیتاں اَتے وسائل دا اشتراک ترقی دے نویں رستے کھولیسی، شزا فاطمہ خواجہ

اسلام آباد۔ 29 نومبر(اے پی پی) وفاقی وزیر انفارمیشن ٹیکنالوجی شزا فاطمہ خواجہ آکھیے جو جدید معلوماتی ٹیکنالوجی خاص طور تے آرٹیفیشل انٹیلیجنس (اے آئی) دے ذریعے اساں دنیا بھر اچ خیالات، صلاحیتاں اَتے وسائل دا ایہو جیہا اشتراک ممکن بݨا سڳدوں جو ترقی دے نویں رستے کھولیسی۔ انہاں آکھیا جو ہر وݙا سفر ہک نِکے قدم نال شروع ہوندے اَتے اڄ پاکستان آئی ٹی دے شعبے اچ اِیہا نویں سفر دا آغاز کریندا پئے۔او اسلام آباد اچ آئی ٹی نال متعلق ہک اہم تقریب نال خطاب کریندیاں پئیاں ہن۔ وفاقی وزیر آکھیا جو پاکستان آوݨ آلے سالاں اچ ٹیکنالوجی تے مبنی ترقی دی طرف تیزی نال ودھدا پئے اَتے ایں سفر اچ نوجواناں دیاں تخلیقی صلاحیتاں ساریں توں قیمتی اثاثہ ہِن۔شزا فاطمہ خواجہ آکھیا جو دنیا تکھے ڈیجیٹل معیشت دی طرف ویندی پئی اے، ایہو جیہے اچ آئی ٹی دا شعبہ نہ صرف روزگار دے موقع پیدا کریندا پئے بلکہ پاکستان دی عالمی سطح تے سنڄاݨ کوں وی مضبوط بݨیندا پئے۔ انہاں ایں ڳالھ تے زور ݙتا جو آرٹیفیشل انٹیلیجنس ٹیکنالوجی او طاقتور ذریعہ اے جیں دے ذریعے خیالات کوں حقیقت اچ بدݪیا ونڄ سڳدے۔وفاقی وزیر مزید آکھیا جو مستقبل دی تعمیر صرف ٹیکنالوجی نال ممکن نئیں ایں دے نال اخلاقی اقدار، انسانی ہمدردی اَتے ذمہ داری دا احساس وی ضروری اے۔ انہاں دا آکھݨ ہئی جو پاکستانی نوجواناں کنے آئیڈیاز، ہُنر اَتے وژن دی کوئی کمی کائنی۔ لوڑھ صرف ایہو جیہے پلیٹ فارمز دی اے جتھاں او آپݨی مہارت کوں دنیا دے سامݨے گھن آ سڳن۔ انہاں آکھیا جو حکومت آئی ٹی دے شعبے اچ ریفارمز، سرمایہ کاری اَتے جدید تربیت دے ذریعے ایں سفر کوں تیز کریندی پئی اے تاں جو پاکستان مستقبل دی عالمی ٹیکنالوجی مارکیٹ اچ مضبوط مقام حاصل کرسڳے۔تقریب اچ آئی ٹی ماہرین، طلبہ، پالیسی سازاں اَتے نجی شعبے دے نمائندیں وݙی تعداد اچ شرکت کیتی، جنہاں وفاقی وزیر دے وژن دی تعریف کیتی اَتے آکھیا جو پاکستان دا آئی ٹی سیکٹر خطے اچ نمایاں ترقی دی صلاحیت رکھیندے۔