`صدرِ مملکت آصف علی زرداری دا پاکستان پیپلز پارٹی دے یومِ تاسیس تے پیغام

اسلام آباد۔ 30 نومبر (اے پی پی) صدرِ مملکت آصف علی زرداری پاکستان پیپلز پارٹی دے 58 ویں یومِ تاسیس دے موقع تے پارٹی دے بانی چیئرمین شہید ذوالفقار علی بھٹو اَتے شہید محترمہ بینظیر بھٹو کوں خراجِ عقیدت پیش کریندے آکھیے جو انہاں دے وژن، ہمت اَتے قربانیاں پاکستان دیاں جمہوری بنیاداں کوں مضبوط کیتے اَتے او کئی نسلاں تے اثر انداز تھئے۔ایوان صدر دے پریس ونگ موجب صدرِ مملکت پاکستان پیپلز پارٹی دے 58 ویں یومِ تاسیس تے آپݨے پیغام اچ آکھیا جو آپݨی پُوری تاریخ اچ پاکستان پیپلز پارٹی دور دے مرکزی چیلنجز دا مقابلہ کرݨ کیتے ہمیشہ جدوجہد کیتی۔ انہاں آکھیا جو جݙاں پاکستان تے آمریت دا سایہ ہئی، پیپلز پارٹی جمہوریت دی مزاحمت کرݨ آلی پارٹی دے طور تے ڈٹ تے مقابلہ کیتا اَتے عوامی حقوق دی بحالی دی جدوجہد دی قیادت کیتی۔صدرِ مملکت آکھیا جو پارٹی ہمیشہ جمہوری نظام کوں مستحکم کرݨ، اتحاد کوں ودھارا ݙیوݨ اَتے سیاسی عمل کوں درست رستے تے رکھݨ کیتے کم کیتے۔ انہاں آکھیا جو شہید ذوالفقار علی بھٹو دی قیادت اچ پاکستان 1973 اچ متفقہ آئین حاصل کیتے، ہک قومی میثاق جو اڄ وی اساݙی جمہوریت دی رہنمائی کریندا پئے۔صدرِ آصف علی زرداری آکھیا جو پیپلز پارٹی کوں وفاق دے استحکام، گلگت بلتستان اَتے آزاد جموں و کشمیر اچ اصلاحات دے آغاز، مُلک دے ایٹمی پروگرام دی بنیاد رکھݨ اَتے زمین، مزدور، تعلیم اَتے سماجی انصاف متعلق تاریخی اصلاحات تے فخر اے۔ انہاں آکھیا جو تحریک بحالیِ جمہوریت (ایم آر ڈی) اَتے اتحاد برائے بحالیِ جمہوریت (اے آر ڈی) توں گھن تے چارٹر آف ڈیموکریسی، اٹھارویں ترمیم اَتے نیشنل ایکشن پلان تئیں، پیپلز پارٹی پاکستان دے جمہوری ارتقاء اچ مرکزی کردار ادا کریندی پئی اے۔صدر مملکت آکھیا جو آپݨے آغاز توں ہی پاکستان پیپلز پارٹی مزدوراں، کساناں، تریمتاں، اقلیتاں اَتے سارے پِسے ہوئے طبقیں دی آواز رہی اے، انہاں دی شمولیت اَتے انہاں کوں بااختیار بݨاوݨ اساݙی سیاسی سمت دا تعین کریندا رہیے اَتے اڄ وی اساݙے مشن دا مرکز اے۔ انہاں آکھیا جو آؤ اڄ دے ݙینھ اساں جمہوریت، سماجی انصاف، مساوات اَتے سارے شہریاں خاص طور تے تریمتاں اَتے اقلیتاں کوں بااختیار بݨاوݨ دے عزم کوں ہک واری ول تازہ کروں جو انہاں دی فعال شمولیت پاکستان دے پُرامن اَتے تکثیری مستقبل کیتے ناگزیر اے۔صدرِ آصف علی زرداری آکھیا جو میں سارے پارٹی کارکناں اَتے سپورٹراں کوں آکھݨ چاہنداں جو او جمہوری اتحاد کوں برقرار رکھن، وفاق دی حفاظت کرن اَتے ہک روادار اَتے ترقی پسند پاکستان کیتے کم کرن