پی ٹی آئی دا ملک دشمن عناصر نال گٹھ جوڑ بے نقاب تھی چُکیے، خیبر پختونخوا حکومت دی کمزوریاں در اندازی دے واقعے ودھݨ دی وݙی وجہ ہِن، عطاء اللہ تارڑ

لاہور۔ 30 نومبر (اے پی پی) وفاقی وزیر اطلاعات و نشریات عطاء اللہ تارڑ آکھیے جو پی ٹی آئی دا ملک دشمن عناصر نال گٹھ جوڑ بے نقاب تھی چُکیے، اَتے خیبر پختونخوا حکومت دی کمزوریاں اَتے کوتاہیاں دراندازی دے واقعے ودھݨ دی وݙی وجہ ہِن۔ انہاں آکھیا جو گزریل 12 سالاں اچ خیبر پختونخوا اچ موثر پراسیکیوشن دا نظام قائم نی کیتا ونڄ سڳیا، اَتے صوبے اچ پچھلے تریجھے سالاں دوران ہزاراں مقدمے زیر التواء ہِن جݙاں جو چار ہزار دے نیڑے مقدمیں اچ اڄ تئیں فرد جرم نی لاتی ونڄ سڳی۔عطاء اللہ تارڑ آکھیا جو وزیر اعلیٰ خیبر پختونخوا کوں اڈیالہ جیل دے ٻاہر نعرے لاوݨ تے آندن پر انہاں کوں “پراسیکیوشن” دے سپیلنگ کائنی پتہ۔ انہاں آکھیا جو ساڈھے 12 سالاں اچ پی ٹی آئی دی حکومت نان کسٹم پیڈ گاݙیاں دا سدباب نی کر سڳی اَتے انہاں دے پاروں قومی خزانے کوں ارباں دا نقصان تھیندا پئے۔ انہاں الزام لاتا جو خیبر پختونخوا اچ منشیات دی سمگلنگ کوں پروموٹ کیتا ویندے، اَتے جنوری 2025ء توں اگست 2025ء تئیں صوبے اچ ݙاہ ہزار توں ودھ ڈرگ ٹریفکنگ دے مقدمے رجسٹرڈ ہِن پر سزا دی شرح نہ ہووݨ دے برابر اے، جیں دا مطلب اے جو کے پی حکومت دی کارکردگی صفر اے۔انہاں آکھیا جو پاک فوج دے جوان اَتے افسر آپݨے خون نال او گیپ پُورے کریندے پئن جیڑھے صوبائی حکومت دی غفلت اَتے کمزوریاں پاروں پیدا تھیندِن۔ انہاں آکھیا جو پولیٹیکل ٹیرر کرائم نیکسس (Political Terror Crime Nexus) دے پاروں اصلاحات نی تھیندیاں پیاں ۔ انہاں آکھیا جو نان کسٹم پیڈ گاݙیاں اَتے ٹوبیکو مافیا توں حاصل تھیوݨ آلا پیسہ دہشت گردی اچ استعمال تھیندا پئے اَتے پی ٹی آئی دا گٹھ جوڑ بھارت اَتے افغانستان نال اے۔